റേഷൻ ഭക്ഷ്യധാന്യ വിതരണത്തിലെ ക്രമക്കേടുകൾ; പ്രചാരണങ്ങൾ നിഷേധിച്ച് കുവൈറ്റ് വാണിജ്യ മന്ത്രാലയം

കുവൈറ്റ് സിറ്റി: സബ്‌സിഡി നിരക്കിലുള്ള ഭക്ഷ്യവസ്തുക്കളുടെ വിതരണത്തിൽ ക്രമക്കേടുകൾ നടക്കുന്നുവെന്ന വ്യാജ പ്രചാരണങ്ങൾ കുവൈറ്റ് വാണിജ്യ വ്യവസായ മന്ത്രാലയം (MOCI) ശക്തമായി നിഷേധിച്ചു. ചില മാധ്യമ സ്ഥാപനങ്ങളിലും സാമൂഹിക മാധ്യമങ്ങളിലും പ്രചരിക്കുന്ന ഈ 

റിപ്പോർട്ടുകൾ തികച്ചും അടിസ്ഥാനരഹിതമാണെന്ന് മന്ത്രാലയം പ്രസ്താവനയിൽ അറിയിച്ചു. റേഷൻ പദ്ധതി പ്രകാരമുള്ള ചിക്കൻ വിതരണം കിലോ കണക്കിലല്ല, എണ്ണമായോ കാർട്ടൺ കണക്കിലോ ആണ് നൽകുന്നത് എന്നായിരുന്നു പ്രധാന ആരോപണം. എന്നാൽ ഇത് പൂർണ്ണമായും തെറ്റാണെന്ന് മന്ത്രാലയം വ്യക്തമാക്കി.

"റേഷൻ പദ്ധതിയുടെ ഭാഗമായി ചിക്കൻ വിതരണം ചെയ്യുന്നത്, അംഗീകൃത ചട്ടങ്ങൾക്കനുസരിച്ച് ഒരാൾക്ക് കിലോ കണക്കിലാണ്," മന്ത്രാലയം വിശദീകരിച്ചു. കാർട്ടൺ കണക്കിലോ എണ്ണത്തിലോ അല്ല വിതരണം നടത്തുന്നതെന്നും അവർ കൂട്ടിച്ചേർത്തു.

വ്യാജ വാർത്തകൾ പ്രചരിക്കുന്നത് ശ്രദ്ധയിൽപ്പെട്ട സാഹചര്യത്തിൽ, മാധ്യമ സ്ഥാപനങ്ങളോടും പൗരന്മാരോടും വിവരങ്ങളുടെ കൃത്യത ഉറപ്പാക്കിയ ശേഷം മാത്രം പ്രസിദ്ധീകരിക്കുകയോ പങ്കുവെക്കുകയോ ചെയ്യണമെന്ന് MOCI അഭ്യർത്ഥിച്ചു. റേഷൻ വിഹിതത്തെക്കുറിച്ചുള്ള വിവരങ്ങൾ അറിയാൻ മന്ത്രാലയവുമായി നേരിട്ട് ബന്ധപ്പെടണമെന്നും അവർ പൊതുജനങ്ങളെ അറിയിച്ചു.