കുവൈത്തിലെ ആഭ്യന്തര സുരക്ഷക്ക് പുതിയ മാനം: അത്യാധുനിക 'സ്മാർട്ട് സെക്യൂരിറ്റി പട്രോൾ' അവതരിപ്പിച്ചു

കുവൈത്ത് സിറ്റി: ആഭ്യന്തര സുരക്ഷാ മേഖലയിൽ വിപ്ലവകരമായ മാറ്റങ്ങൾ ലക്ഷ്യമിട്ട് കുവൈത്ത്, അത്യാധുനിക സാങ്കേതികവിദ്യകളോടുകൂടിയ പുതിയ 'സ്മാർട്ട് സെക്യൂരിറ്റി പട്രോൾ' അവതരിപ്പിച്ചു.

ഒന്നാം ഉപപ്രധാനമന്ത്രിയും ആഭ്യന്തര മന്ത്രിയുമായ ഷെയ്ഖ് ഫഹദ് യൂസഫ് സൗദ് അൽ-സബാഹ് ഹ്യൂമൻ റിസോഴ്‌സസ് സെക്ടറിന് കീഴിലുള്ള ഈ പുതിയ പട്രോൾ യൂണിറ്റ് നേരിട്ടെത്തി പരിശോധിച്ചു.

അഡ്വാൻസ്ഡ് ഇന്റലിജന്റ് സിസ്റ്റങ്ങൾ, സുപ്രധാന ഘടകങ്ങൾ എന്നിവയെക്കുറിച്ച് മന്ത്രിക്ക് വിശദമായ വിവരങ്ങൾ നൽകി.

പുതിയ പട്രോൾ യൂണിറ്റിന്റെ ഏറ്റവും വലിയ പ്രത്യേകത, തത്സമയം ദൃശ്യങ്ങൾ വിശകലനം ചെയ്യാനും പ്രോസസ്സ് ചെയ്യാനും കഴിയുന്ന ആർട്ടിഫിഷ്യൽ ഇന്റലിജൻസ് (AI) സാങ്കേതികവിദ്യയാണ്.

ഈ അത്യാധുനിക സംവിധാനം ഫീൽഡിലെ പ്രവർത്തനക്ഷമതയും പ്രവർത്തന കൃത്യതയും വളരെയധികം മെച്ചപ്പെടുത്താൻ സഹായിക്കുമെന്നാണ് അധികൃതർ വിലയിരുത്തുന്നത്.

കുവൈത്തിലെ സുരക്ഷാ സംവിധാനങ്ങൾ കൂടുതൽ ആധുനികവത്കരിക്കുന്നതിന്റെ ഭാഗമായാണ് ഈ സ്മാർട്ട് പട്രോൾ യൂണിറ്റ് അവതരിപ്പിച്ചത്.