കുവൈറ്റിന് അഭിമാനമായി എഞ്ചിനീയർ അബ്ദുല്ല അൽ-ഗരീബ്: സുസ്ഥിര  ഗവേഷണത്തിന് 'അറബ് യുവജന മികവ് പുരസ്‌കാരം

കുവൈറ്റ് സിറ്റി: കുവൈറ്റി എഞ്ചിനീയറിങ് സമൂഹത്തിന് അഭിമാനമായി, നൂതനമായ ഗവേഷണത്തിന് കുവൈറ്റി എഞ്ചിനീയർ അബ്ദുല്ല അൽ-ഗരീബ് അറബ് യുവജന മികവ് പുരസ്‌കാരം (Arab Youth Excellence Award) നേടി. സുസ്ഥിര നിർമ്മാണ മേഖലയിൽ വിപ്ലവം സൃഷ്ടിക്കാൻ സാധ്യതയുള്ള ഗവേഷണത്തിനാണ് അൽ-ഗരീബിന് ഈ അന്താരാഷ്ട്ര അംഗീകാരം ലഭിച്ചത്.

ലീഗ് ഓഫ് അറബ് സ്റ്റേറ്റ്സ് സംഘടിപ്പിച്ച ഈ പുരസ്‌കാരത്തിന്റെ 13-ാം പതിപ്പിൽ, ഗവേഷണ, നവീകരണ വിഭാഗത്തിലെ നേട്ടത്തിനാണ് കുവൈറ്റ് സൊസൈറ്റി ഓഫ് എഞ്ചിനീയേഴ്‌സ് ബോർഡ് ഓഫ് ഡയറക്‌ടേഴ്‌സ് അംഗം കൂടിയായ അൽ-ഗരീബ് അർഹനായത്.
"കോൺക്രീറ്റിന്റെ ഗുണമേന്മ വർദ്ധിപ്പിക്കുന്നതിനായി റബ്ബർ ടയർ മാലിന്യങ്ങളും ഗ്ലാസും പുനരുപയോഗിക്കുക" എന്നതായിരുന്നു അൽ-ഗരീബിന്റെ ശ്രദ്ധേയമായ ഗവേഷണ പദ്ധതി.

 പാഴാക്കിക്കളയുന്ന ടയർ മാലിന്യങ്ങളും ഗ്ലാസും ഫലപ്രദമായി ഉപയോഗിച്ച് പരിസ്ഥിതിക്ക് ദോഷകരമാകാത്ത രീതിയിൽ കോൺക്രീറ്റിന്റെ നിർമ്മാണത്തിൽ ഉപയോഗിക്കുകയ്യും ഈ മാലിന്യങ്ങൾ ചേർക്കുന്നത് കോൺക്രീറ്റിന്റെ യാന്ത്രിക ഗുണങ്ങൾ (Mechanical Properties) മെച്ചപ്പെടുത്താൻ സഹായിക്കുമെന്ന് പഠനം തെളിയിച്ചു.

പാരിസ്ഥിതിക ആഘാതം കുറച്ചുകൊണ്ട്, മേഖലയിലെ സുസ്ഥിര കെട്ടിട നിർമ്മാണ രീതികളെ പിന്തുണയ്ക്കുന്ന ഒരു സമീപനമാണിത്.
ഈ നേട്ടം കുവൈറ്റിന്റെ കണ്ടുപിടിത്തങ്ങളെയും ശാസ്ത്ര ഗവേഷണങ്ങളെയും പ്രോത്സാഹിപ്പിക്കുന്നതിനുള്ള രാജ്യത്തിന്റെ പിന്തുണയുടെ ഫലമാണെന്ന് അൽ-ഗരീബ് പ്രതികരിച്ചു. 

ഈ അഭിമാന നിമിഷം അദ്ദേഹം കുവൈറ്റ് അമീർ ഷെയ്ഖ് മിഷാൽ അൽ-അഹ്മദ് അൽ-ജാബർ അൽ-സബാഹിനും, കിരീടാവകാശിക്കും, കുവൈറ്റ് ജനതയ്ക്കും സമർപ്പിച്ചു. അറബ് യുവജന കൗൺസിലിനും അറബ് ലീഗിനും അദ്ദേഹം നന്ദി രേഖപ്പെടുത്തുകയും ചെയ്തു.