എസ്.ഐ.ആർ ഭീഷണി: പ്രവാസികളുടെ വോട്ടവകാശം ഉറപ്പാക്കണം; രേഖാ ഇളവുകൾ ഉടൻ പ്രഖ്യാപിക്കണം – പ്രവാസി വെൽഫെയർ കുവൈറ്റ്

കുവൈറ്റ്‌: ​ഇന്ത്യൻ തിരഞ്ഞെടുപ്പ് കമ്മീഷൻ പ്രഖ്യാപിച്ച സ്പെഷ്യൽ ഇൻ്റൻസീവ് റിവിഷൻ (SIR) നടപടികൾ പ്രവാസികളുടെ വോട്ടവകാശത്തെ പ്രതികൂലമായി ബാധിക്കുമെന്ന അങ്ങേയറ്റം ആശങ്കാകുലമായ നിലപാട് പ്രവാസി വെൽഫെയർ സാമൂഹിക വിഭാഗം അറിയിച്ചു. പ്രവാസി വെൽഫെയർ വിളിച്ചു ചേർത്ത അടിയന്തര സെക്രട്ടേറിയറ്റിലാണ് ആശങ്ക അറിയിച്ചത്.

​വിദേശത്ത് ജോലി ചെയ്യുന്ന ഒരാൾ തൻ്റെ നാട്ടിലെ 'സാധാരണ താമസക്കാരൻ' അല്ലാതാവുന്നില്ല എന്ന നിയമപരമായ വസ്തുത ഉദ്യോഗസ്ഥർ മനസ്സിലാക്കാതെ വരുമ്പോൾ, വീടുകൾ തോറുമുള്ള പരിശോധനയിൽ ലക്ഷക്കണക്കിന് മലയാളികളുടെ പേര് വോട്ടർ പട്ടികയിൽ നിന്ന് നീക്കം ചെയ്യപ്പെടാൻ ഇടയുണ്ട്.

​കൂടാതെ, വോട്ടർമാർ അവരുടെ പേരുകൾ 2002-2005 കാലയളവിലെ പഴയ വോട്ടർപട്ടികയുമായി ബന്ധിപ്പിക്കണമെന്ന നിബന്ധന പ്രവാസി കുടുംബങ്ങൾക്ക് വലിയ രേഖാപരമായ വെല്ലുവിളിയാണ് ഉയർത്തുന്നത്. ഇത് സാങ്കേതികപരമായ കാരണങ്ങളാൽ വലിയ തോതിലുള്ള ഒഴിവാക്കലുകൾക്ക് വഴിയൊരുക്കും.

​അതുകൊണ്ട്, പ്രവാസി വോട്ടർമാരെ കണക്കിലെടുത്ത്, വോട്ടർ പട്ടിക പുതുക്കൽ പ്രക്രിയയിൽ പ്രത്യേക ഇളവുകൾ അനുവദിക്കണമെന്നും, ഓൺലൈൻ മുഖേന രേഖകൾ സമർപ്പിക്കാനുള്ള ലളിതമായ സംവിധാനം ഒരുക്കണമെന്നും പ്രവാസി വെൽഫെയർ സാമൂഹിക വിഭാഗം ആവശ്യപ്പെട്ടു. നാട്ടിൽ ഹാജരില്ലാത്തതിൻ്റെ പേരിൽ ഒരൊറ്റ യോഗ്യതയുള്ള വോട്ടറെയും ഒഴിവാക്കരുതെന്നും പൗരാവകാശ സംരക്ഷണത്തിന് പ്രാധാന്യം നൽകണമെന്നും പ്രവാസി വെൽഫെയർ കുവൈത്ത് അഭ്യർഥിക്കുന്നു.