ശീതകാലം: അടച്ചിട്ട മുറികളിൽ കരി ഉപയോഗിച്ച് ചൂടാക്കരുത്; കർശന മുന്നറിയിപ്പുമായി കുവൈറ്റ് ഫയർ ഫോഴ്സ്

കുവൈറ്റ് സിറ്റി: രാജ്യത്ത് ശൈത്യകാലം ആരംഭിച്ചതോടെ പൊതുജനങ്ങൾക്കായി സുരക്ഷാ ക്യാമ്പയിനുമായി കുവൈറ്റ് ഫയർ ഫോഴ്സ് രംഗത്ത്. അടച്ചിട്ടതോ വായുസഞ്ചാരം കുറഞ്ഞതോ ആയ മുറികളിൽ ചൂടാക്കുന്നതിനായി കരി (charcoal) ഉപയോഗിക്കുന്നതിനെതിരെയാണ് അധികൃതർ പ്രധാനമായും മുന്നറിയിപ്പ് നൽകിയിരിക്കുന്നത്.

ഇത്തരം സാഹചര്യങ്ങളിൽ ഉണ്ടാകുന്ന 'കാർബൺ മോണോക്സൈഡ്' എന്ന മാരക വാതകം ശ്വാസംമുട്ടലിനും തുടർന്ന് അതിവേഗം മരണത്തിനും വരെ കാരണമായേക്കാം. നിറമോ മണമോ ഇല്ലാത്ത ഈ വാതകം തിരിച്ചറിയാൻ സാധിക്കാത്തതുകൊണ്ട് തന്നെ പലപ്പോഴും ഉറക്കത്തിലായിരിക്കും ആളുകൾ ഇതിന്റെ ഇരകളാകുന്നത്.

ഈ ശീതകാലം അവസാനിക്കുന്നത് വരെ സുരക്ഷിതമായ ചൂടാക്കൽ രീതികൾ (safe heating practices) മാത്രമേ പൊതുജനങ്ങൾ പിന്തുടരാവൂ എന്നും ഇത്തരം അപകടസാധ്യതകൾ ഒഴിവാക്കണമെന്നും കുവൈറ്റ് ഫയർ ഫോഴ്സ് കർശന നിർദ്ദേശം നൽകി.