കുവൈത്തിൽ പ്രവാസികൾക്ക് വായ്പാ നയത്തിൽ വൻ ഇളവ്; 70,000 ദിനാർ വരെ വായ്പ ലഭിക്കും

കുവൈത്ത് സിറ്റി: കുവൈത്തിലെ പ്രവാസികൾക്ക് ആശ്വാസമേകുന്ന സുപ്രധാന തീരുമാനവുമായി ബാങ്കിംഗ് മേഖല. പ്രവാസികൾക്കുള്ള വായ്പാ നയത്തിൽ ബാങ്കുകൾ വലിയ മാറ്റങ്ങൾ വരുത്തിയതായി 'അൽ റായ്' ദിനപത്രം റിപ്പോർട്ട് ചെയ്യുന്നു. 2023 മുതൽ വ്യക്തിഗത വായ്പകളിൽ ഉണ്ടായ മാന്ദ്യം മറികടക്കാനും വിപണി ഉത്തേജിപ്പിക്കാനുമാണ് പുതിയ നീക്കം.

റിപ്പോർട്ട് പ്രകാരമുള്ള പ്രധാന മാറ്റങ്ങൾ താഴെ പറയുന്നവയാണ്:

വായ്പാ പരിധി ഉയർത്തി: പ്രതിമാസം 3,000 ദിനാറോ അതിൽ കൂടുതലോ ശമ്പളം ലഭിക്കുന്ന പ്രവാസികൾക്ക് 70,000 ദിനാർ വരെ വായ്പ ലഭിക്കാൻ അർഹതയുണ്ടാകും. 1,500 ദിനാർ മുതൽ ശമ്പളമുള്ളവർക്കും വലിയ തുകയുടെ വായ്പകൾ ലഭിക്കും.

ഇടത്തരം വരുമാനക്കാർക്കും ആശ്വാസം: 600 ദിനാർ മുതൽ ശമ്പളം ലഭിക്കുന്നവർക്ക് പരമാവധി 15,000 ദിനാർ വരെ വായ്പ അനുവദിക്കും.

തിരിച്ചടവ് വ്യവസ്ഥ: സെൻട്രൽ ബാങ്ക് ചട്ടപ്രകാരം, വായ്പാ തിരിച്ചടവിന്റെ മാസഗഡു ശമ്പളത്തിന്റെ 40 ശതമാനത്തിൽ കവിയാൻ പാടില്ല.

ഡിജിറ്റൽ സേവനം: ഉയർന്ന വരുമാനക്കാർക്ക് ബാങ്ക് ശാഖകൾ വഴി നേരിട്ടും, ഇടത്തരം/ചെറിയ ശമ്പളക്കാർക്ക് ഡിജിറ്റൽ സംവിധാനങ്ങൾ വഴിയുമാണ് വായ്പ അനുവദിക്കുക.

മാനദണ്ഡങ്ങൾ: വായ്പ ലഭിക്കുന്നതിന് തൊഴിൽ സ്ഥിരത, സാമ്പത്തിക ഭദ്രതയുള്ള സ്ഥാപനങ്ങളിലെ ജോലി, യഥാർത്ഥ തൊഴിൽ അടിസ്ഥാനമാക്കിയുള്ള ശമ്പളം എന്നിവ ബാങ്കുകൾ ഉറപ്പുവരുത്തും.

സർക്കാർ ജീവനക്കാർ, ഡോക്ടർമാർ, നഴ്സുമാർ, എൻജിനീയർമാർ, അധ്യാപകർ, ബിസിനസ് ഉടമകൾ തുടങ്ങിയവർക്കാണ് വായ്പയ്ക്ക് മുൻഗണന.

ഭവന നവീകരണം പോലുള്ള ആവശ്യങ്ങൾക്കുള്ള വായ്പാ പരിധി 25,000 ദിനാറിൽ നിന്ന് 70,000 ദിനാറായി ഉയർത്തുകയും തിരിച്ചടവ് കാലാവധി 7 വർഷമായി ദീർഘിപ്പിക്കുകയും ചെയ്തിട്ടുണ്ട്.

മുൻകാലങ്ങളിൽ ചെറിയ ബാങ്കുകൾ മാത്രം നൽകിയിരുന്ന വായ്പകൾ ഇപ്പോൾ വൻകിട ബാങ്കുകളും നൽകാൻ തുടങ്ങിയത് പ്രവാസികൾക്ക് ഗുണകരമാകും.