ഇസ്‌ലാമാബാദിലെ പള്ളിയിലുണ്ടായ ഭീകരാക്രമണത്തെ കുവൈറ്റ് ശക്തമായി അപലപിച്ചു

കുവൈറ്റ് സിറ്റി: പാകിസ്താൻ തലസ്ഥാനമായ ഇസ്‌ലാമാബാദിലെ പള്ളിയിലുണ്ടായ ഭീകര സ്ഫോടനത്തെ കുവൈറ്റ് വിദേശകാര്യ മന്ത്രാലയം ശക്തമായി അപലപിച്ചു.

നിരവധി പേരുടെ മരണത്തിനും പരിക്കിനും കാരണമായ ഈ ആക്രമണം അങ്ങേയറ്റം വേദനാജനകമാണെന്ന് മന്ത്രാലയം പ്രസ്താവനയിൽ അറിയിച്ചു.

ആരാധനാലയങ്ങളെ ലക്ഷ്യം വയ്ക്കുന്നതും നിരപരാധികളായ മനുഷ്യരെ ഭയപ്പെടുത്തുന്നതുമായ എല്ലാത്തരം അക്രമങ്ങളെയും തീവ്രവാദത്തെയും കുവൈറ്റ് നഖശിഖാന്തം എതിർക്കുന്നു. ഇത്തരം ഭീകരപ്രവർത്തനങ്ങൾക്കെതിരെ രാജ്യം എന്നും ഉറച്ച നിലപാടാണ് സ്വീകരിച്ചിട്ടുള്ളതെന്നും മന്ത്രാലയം വ്യക്തമാക്കി.

ദുരന്തത്തിൽ ജീവൻ നഷ്ടപ്പെട്ടവരുടെ കുടുംബാംഗങ്ങളോടും പാകിസ്താൻ ഗവൺമെന്റിനോടും ജനങ്ങളോടും കുവൈറ്റ് അഗാധമായ അനുശോചനം രേഖപ്പെടുത്തി. സ്ഫോടനത്തിൽ പരിക്കേറ്റവർ എത്രയും വേഗം സുഖം പ്രാപിക്കട്ടെയെന്നും മന്ത്രാലയം പ്രത്യാശ പ്രകടിപ്പിച്ചു.