ഇടുക്കി അസോസിയേഷൻ കുവൈറ്റ് വാർഷിക പിക്നിക് ‘ദി ​ഗ്രേറ്റ് എസ്കേപ്പ്-2026’ ആവേശകരമായി സമാപിച്ചു

കുവൈറ്റ്: ഇടുക്കി അസോസിയേഷൻ കുവൈറ്റിന്റെ (IAK) വാർഷിക പിക്നിക് ‘The Great Escape 2026’ ഫെബ്രുവരി 12, 13 തീയതികളിൽ അൽ മുബാറകിയ ഫാമിൽ വെച്ച് ആവേശകരമായി സംഘടിപ്പിച്ചു. അസോസിയേഷന്റെ എക്സിക്യൂട്ടീവ് കമ്മിറ്റിയും വനിതാ ഫോറവും കൈകോർത്ത് നടത്തിയ ഈ മഹത്തായ പരിപാടിയിൽ മുന്നൂറോളം കുടുംബാംഗങ്ങളാണ് പങ്കെടുത്തത്.

രണ്ടുദിവസം നീണ്ടുനിന്ന പിക്നിക് പരിപാടികൾ അംഗങ്ങൾക്ക് ആവേശവും ഐക്യവും നിറഞ്ഞ അനുഭവമായി മാറി.

വിവിധ കലാപരിപാടികളും വിനോദ-കായിക മത്സരങ്ങളും പങ്കെടുത്തവരെ സജീവമായി ഉൾപ്പെടുത്തുകയും എല്ലാവർക്കും സന്തോഷകരമായ നിമിഷങ്ങൾ സമ്മാനിക്കുകയും ചെയ്തു. കുട്ടികൾക്കായി പ്രത്യേക ഗെയിംസുകളും, സ്ത്രീകൾക്കും പുരുഷന്മാർക്കും വേറിട്ട മത്സരങ്ങളും സംഘാടകർ ഒരുക്കിയിരുന്നു.

പങ്കെടുത്ത കുടുംബങ്ങൾക്കിടയിൽ ഒരുമയും സൗഹൃദവും കൂടുതൽ ശക്തിപ്പെടുത്തുന്ന മനോഹര വേദിയായി പിക്നിക് മാറി. കേരളത്തിന്റെ തനതായ രുചികൾ ഒരുക്കിയ ‘നാടൻ തട്ടുകട’ പിക്നിക്കിന്റെ പ്രധാന ആകർഷണമായി മാറുകയും പങ്കെടുത്തവരുടെ വലിയ പ്രശംസ പിടിച്ചുപറ്റുകയും ചെയ്തു. ഐ.എ.കെ നേതൃത്വത്തിന്റെ മികച്ച സംഘാടന ശേഷിയും വനിതാ ഫോറത്തിന്റെ സജീവ പങ്കാളിത്തവും പരിപാടിയുടെ വിജയത്തിൽ നിർണ്ണായക പങ്കുവഹിച്ചു.

പ്രസിഡന്റ് ബിനു അഗൽ ജോസ്, ജനറൽ സെക്രട്ടറി ജോമോൻ പി ജേക്കബ്, ട്രഷറർ ബിജു ജോസ്, പിക്നിക് കൺവീനർ ഔസേപ്പച്ചൻ തോട്ടുംങ്കൽ, വിമൻസ് ഫോറം ചെയർപേഴ്സൺ ദവ്യ അനൂപ് എന്നിവർ ചടങ്ങിൽ ആശംസകൾ അർപ്പിച്ചു. എല്ലാവർക്കും മറക്കാനാവാത്ത ഓർമ്മകൾ സമ്മാനിച്ച ഈ ഒത്തുചേരൽ, ഇടുക്കി അസോസിയേഷൻ കുവൈറ്റിന്റെ ചരിത്രത്തിലെ മറ്റൊരു ശ്രദ്ധേയ അധ്യായമായി മാറി.