നാഷണൽ ഗാർഡ് രാജ്യത്തിന്റെ കാവൽക്കോട്ടയും വിശ്വസ്ത കരുത്തുമെന്ന് കുവൈറ്റ് അമീർ

കുവൈറ്റ് സിറ്റി: കുവൈറ്റ് നാഷണൽ ഗാർഡ് രാജ്യത്തിന്റെ സുരക്ഷാ കോട്ടയാണെന്നും മാതൃരാജ്യത്തെ സംരക്ഷിക്കുന്നതിൽ വിശ്വസ്തമായ കരുത്തായി അവർ നിലകൊള്ളുന്നുവെന്നും കുവൈറ്റ് അമീർ ഷെയ്ഖ് മിഷാൽ അൽ-അഹമ്മദ് അൽ-ജാബർ അൽ-സബാഹ് പ്രസ്താവിച്ചു. 

റമദാൻ മാസത്തോടനുബന്ധിച്ചും കുവൈറ്റിന്റെ ദേശീയ ദിനാഘോഷങ്ങളുടെ ഭാഗമായും നാഷണൽ ഗാർഡ് ആസ്ഥാനം സന്ദർശിച്ച് സംസാരിക്കുകയായിരുന്നു അമീർ. കിരീടാവകാശി ഷെയ്ഖ് സബാഹ് ഖാലിദ് അൽ-ഹംദ് അൽ-സബാഹ്, പ്രധാനമന്ത്രി ഷെയ്ഖ് അഹമ്മദ് അബ്ദുള്ള അൽ-അഹമ്മദ് അൽ-സബാഹ് എന്നിവരും അമീറിനൊപ്പമുണ്ടായിരുന്നു.

കുവൈറ്റിന്റെ സൈനിക-സുരക്ഷാ സംവിധാനങ്ങളിൽ നാഷണൽ ഗാർഡ് കൈവരിച്ച ശ്രദ്ധേയമായ പുരോഗതിയെ അമീർ തന്റെ പ്രസംഗത്തിൽ അഭിനന്ദിച്ചു. പ്രതിരോധ മന്ത്രാലയം, ആഭ്യന്തര മന്ത്രാലയം, ഫയർ ഫോഴ്‌സ് എന്നിവയുമായി ചേർന്ന് ഏത് വെല്ലുവിളികളെയും നേരിടാൻ സജ്ജമായ രീതിയിൽ നാഷണൽ ഗാർഡ് വളർന്നുവെന്ന് അദ്ദേഹം ഓർമ്മിപ്പിച്ചു. 

രാജ്യത്തിന്റെ തന്ത്രപ്രധാനമായ സ്ഥാപനങ്ങൾക്ക് കാവൽ നൽകുന്നതിലും പൊതുസുരക്ഷ ഉറപ്പാക്കുന്നതിലും അവർ വഹിക്കുന്ന പങ്ക് നിസ്തുലമാണെന്നും അദ്ദേഹം കൂട്ടിച്ചേർത്തു. ഭാവി പ്രവർത്തനങ്ങളിൽ ആധുനിക സാങ്കേതികവിദ്യകളും ആർട്ടിഫിഷ്യൽ ഇന്റലിജൻസും ഉൾപ്പെടുത്തി ഡിജിറ്റൽ പരിവർത്തനം വേഗത്തിലാക്കാൻ അമീർ നാഷണൽ ഗാർഡ് നേതൃത്വത്തിന് നിർദ്ദേശം നൽകി. 

സൈനികരുടെ പരിശീലനം നിരന്തരം മെച്ചപ്പെടുത്തണമെന്നും ഏത് അടിയന്തര സാഹചര്യത്തിലും വേഗത്തിൽ പ്രതികരിക്കാൻ കഴിയുന്ന തരത്തിലുള്ള സന്നദ്ധത നിലനിർത്തണമെന്നും അദ്ദേഹം ആവശ്യപ്പെട്ടു. രാജ്യത്തിന്റെ സ്ഥിരതയും പുരോഗതിയും നിലനിർത്താൻ നാഷണൽ ഗാർഡ് നൽകുന്ന സേവനങ്ങൾക്ക് എല്ലാവിധ പിന്തുണയും വാഗ്ദാനം ചെയ്തുകൊണ്ടാണ് അമീർ തന്റെ സന്ദർശനം പൂർത്തിയാക്കിയത്.