കുവൈറ്റ് അന്താരാഷ്ട്ര വിമാനത്താവളത്തിൽ ഡ്രോൺ ആക്രമണം; ജീവനക്കാർക്ക് പരിക്ക്

കുവൈറ്റ് സിറ്റി: കുവൈറ്റ് അന്താരാഷ്ട്ര വിമാനത്താവളത്തിന് നേരെ ഡ്രോൺ ആക്രമണം ഉണ്ടായതായി സിവിൽ ഏവിയേഷൻ ജനറൽ അതോറിറ്റി അറിയിച്ചു. വിമാനത്താവളത്തിലെ ഒന്നാം നമ്പർ ടെർമിനലിന് (T1) നേരെയാണ് ആക്രമണം ഉണ്ടായതെന്ന് അതോറിറ്റി വക്താവ് അബ്ദുള്ള അൽ രാജി സ്ഥിരീകരിച്ചു. സംഭവത്തിൽ ഏതാനും ജീവനക്കാർക്ക് നിസ്സാര പരിക്കേൽക്കുകയും കെട്ടിടത്തിന് ഭാഗികമായ നാശനഷ്ടങ്ങൾ സംഭവിക്കുകയും ചെയ്തിട്ടുണ്ട്.

ആക്രമണത്തെത്തുടർന്ന് വിമാനത്താവളത്തിൽ അടിയന്തര സുരക്ഷാ ക്രമീകരണങ്ങൾ ഏർപ്പെടുത്തി. നിലവിൽ സ്ഥിതിഗതികൾ പൂർണ്ണമായും നിയന്ത്രണവിധേയമാണെന്നും ബന്ധപ്പെട്ട സുരക്ഷാ ഏജൻസികൾ സ്ഥലം സുരക്ഷിതമാക്കിയതായും അധികൃതർ വ്യക്തമാക്കി. പരിക്കേറ്റവർക്ക് ആവശ്യമായ ചികിത്സ ലഭ്യമാക്കിയിട്ടുണ്ട്. വിമാനത്താവളത്തിന്റെ പ്രവർത്തനങ്ങൾ പുനഃക്രമീകരിക്കുന്നതിനും നാശനഷ്ടങ്ങൾ പരിഹരിക്കുന്നതിനുമുള്ള നടപടികൾ ഉന്നത സുരക്ഷാ മാനദണ്ഡങ്ങൾ പാലിച്ച് പുരോഗമിക്കുകയാണ്.

യാത്രക്കാരുടെയും ജീവനക്കാരുടെയും സുരക്ഷയ്ക്കാണ് പ്രഥമ പരിഗണനയെന്നും ആശങ്കപ്പെടേണ്ട സാഹചര്യമില്ലെന്നും സിവിൽ ഏവിയേഷൻ അതോറിറ്റി അറിയിച്ചു. സംഭവവുമായി ബന്ധപ്പെട്ട കൂടുതൽ വിവരങ്ങൾ ഔദ്യോഗിക വാർത്താ ചാനലുകൾ വഴി യഥാസമയം പുറത്തുവിടുമെന്നും അധികൃതർ കൂട്ടിച്ചേർത്തു.