കുവൈത്തിൽ നാളെ മുതൽ പഠനം ഓൺലൈൻ വഴി; വിദ്യാലയങ്ങൾക്ക് അവധി

കുവൈത്ത് സിറ്റി: മേഖലയിലെ വർധിച്ചുവരുന്ന രാഷ്ട്രീയ സംഘർഷങ്ങളുടെ പശ്ചാത്തലത്തിൽ കുവൈത്തിലെ എല്ലാ വിദ്യാഭ്യാസ സ്ഥാപനങ്ങളും ഓൺലൈൻ പഠന രീതിയിലേക്ക് (Distance Learning) മാറുന്നു. ഫെബ്രുവരി 28 ശനിയാഴ്ച വിദ്യാഭ്യാസ മന്ത്രാലയമാണ് ഇത് സംബന്ധിച്ച നിർണായക ഉത്തരവ് പുറപ്പെടുവിച്ചത്.

മാർച്ച് 1 ഞായറാഴ്ച മുതൽ രാജ്യത്തെ സർക്കാർ, സ്വകാര്യ വിദ്യാലയങ്ങളിൽ നേരിട്ടുള്ള അധ്യയനം ഉണ്ടായിരിക്കില്ല. അടുത്ത അറിയിപ്പ് ഉണ്ടാകുന്നത് വരെ പഠനം ഡിജിറ്റൽ പ്ലാറ്റ്‌ഫോമുകൾ വഴി മാത്രമായിരിക്കും തുടരുക.

നിലവിലെ പ്രാദേശിക രാഷ്ട്രീയ സാഹചര്യങ്ങളും സുരക്ഷാ മുൻകരുതലുകളും കണക്കിലെടുത്താണ് വിദ്യാലയങ്ങൾ അടച്ചിടാൻ തീരുമാനിച്ചത്.

വിദ്യാർത്ഥികളുടെ സുരക്ഷ ഉറപ്പാക്കുന്നതിനായി മന്ത്രാലയം നൽകുന്ന നിർദ്ദേശങ്ങൾ കർശനമായി പാലിക്കണമെന്ന് അധികൃതർ അറിയിച്ചു. ഓൺലൈൻ ക്ലാസുകളെ സംബന്ധിച്ച കൂടുതൽ വിവരങ്ങൾ അതത് സ്കൂളുകൾ വഴി രക്ഷിതാക്കളെ അറിയിക്കുന്നതാണ്.