കുവൈറ്റിലെ പുതിയ എയർപോർട്ട് പ്രോജക്റ്റ് 'ടി 2' വിൻ്റെ പ്രവർത്തന ഘട്ടങ്ങൾ വേഗത്തിലാക്കുമെന്ന് പൊതുമരാമത്ത് വകുപ്പ് മന്ത്രി നൂറ മിഷാൻ

കുവൈറ്റ്‌: പുതിയ എയർപോർട്ട് പ്രോജക്ട് (T2) പൂർത്തിയാക്കി ഷെഡ്യൂൾ ചെയ്ത ടൈംടേബിൾ അനുസരിച്ച് എല്ലാ സേവനങ്ങളും ഒരുക്കുമെന്ന് കുവൈറ്റ്‌ പൊതുമരാമത്ത് മന്ത്രി ഡോ.നൂറ അൽ-മഷാൻ പറഞ്ഞു.

പുതിയ വിമാനത്താവള പദ്ധതിയുടെ എക്സിക്യൂട്ടീവ് ഘട്ടങ്ങൾ വേഗത്തിലാക്കുമെന്നും മന്ത്രി അൽ-മിഷാൻ നടത്തിയ യോഗത്തിന് ശേഷം പുറത്തിറക്കിയ പത്രക്കുറിപ്പിലൂടെ വ്യക്തമാക്കി.

ജനറൽ അഡ്മിനിസ്‌ട്രേഷൻ ഓഫ് സിവിൽ ഏവിയേഷൻ മേധാവി ഷെയ്ഖ് ഹമൂദ് അൽ സബാഹ്, ആഭ്യന്തര മന്ത്രാലയത്തിൻ്റെ പ്രതിനിധികൾ തുടങ്ങിയവർ യോഗത്തിൽ പങ്കെടുത്തു.

പദ്ധതിയുടെ പുരോഗതി അവലോകനം ചെയ്യുകയും തുടർനടപടികൾ സ്വീകരിക്കുകയും അത് നേരിടുന്ന വെല്ലുവിളികൾ തിരിച്ചറിയുകയും അവയെ അതിജീവിക്കാൻ ശ്രമിക്കുകയുമാണ് യോഗത്തിൻ്റെ ലക്ഷ്യമെന്ന് അൽ മഷാൻ പറഞ്ഞു.

ന്യൂ കുവൈറ്റ് 2035 എന്ന കാഴ്ചപ്പാടിന് അനുസരിച്ച് രാജ്യത്തിൻ്റെ അടിസ്ഥാന സൗകര്യങ്ങൾ വികസിപ്പിക്കുകയും നവീകരിക്കുകയും ചെയ്യും.

പുതിയ വിമാനത്താവളം രാജ്യത്തെ നിക്ഷേപം ആകർഷിക്കുന്ന ഒരു പ്രാദേശിക, ആഗോള സാമ്പത്തിക വാണിജ്യ കേന്ദ്രമാക്കി മാറ്റുന്നതിന് സംഭാവന നൽകുമെന്നും ഈ മേഖലയിലെ ഏറ്റവും മികച്ച അന്താരാഷ്ട്ര നിലവാരം സ്വീകരിച്ച് രാജ്യത്തെ വ്യോമഗതാഗത മേഖലയുടെ അടിസ്ഥാന സൗകര്യങ്ങൾ വികസിപ്പിക്കുന്നതിൽ തനിക്ക് വലിയ താൽപ്പര്യമുണ്ടെന്നും അവർ കൂട്ടിച്ചേർത്തു. 

കരാർ കൺസൾട്ടൻ്റ്, മന്ത്രാലയത്തിലെ സൂപ്പർവൈസറി ബോഡി, ബന്ധപ്പെട്ട സർക്കാർ ഏജൻസികൾ എന്നിവയുമായി ഏകോപിപ്പിച്ചാണ് കരാറുകാരൻ ഉപയോഗിച്ച സാമഗ്രികൾ, ഉപകരണങ്ങൾ, പ്രത്യേക കമ്പനികൾ എന്നിവയ്ക്ക് അംഗീകാരം നൽകുന്നതെന്ന് മന്ത്രാലയം സൂചിപ്പിച്ചു.