കുവൈത്തിലെ ഈ റോഡുകൾ താൽക്കാലികമായി അടച്ചു; യാത്രക്കാർ ബദൽ വഴികൾ ഉപയോഗിക്കണമെന്ന് ഗതാഗത വകുപ്പ്

കുവൈറ്റ്: പൊതുഗതാഗത വകുപ്പ് ഇന്ന് പുറത്തിറക്കിയ അറിയിപ്പ് പ്രകാരം, അൽ ഉമൈരിയയ്ക്കും ഫർവാനിയയ്ക്കും ഇടയിലുള്ള ജോർദാൻ റോഡിന്റെ ഒരു ഭാഗം താൽക്കാലികമായി അടച്ചിടും. എയർപോർട്ട് റോഡ് മുതൽ അൽ ഗസാലി റോഡ് വരെയുള്ള ഭാഗം അറ്റകുറ്റപ്പണികൾക്കായി പൂർണ്ണമായും അടച്ചിടുന്നതാണ്.

വ്യാഴാഴ്ച മുതൽ ജൂലൈ 26 ശനിയാഴ്ച രാവിലെ വരെയായിരിക്കും റോഡ് അടച്ചിടുക. ഈ ദിവസങ്ങളിൽ പ്രസ്തുത റോഡിലൂടെയുള്ള ഗതാഗതം പൂർണ്ണമായും നിരോധിക്കും.

വാഹനമോടിക്കുന്ന എല്ലാവരും നിർദ്ദേശ ബോർഡുകൾ ശ്രദ്ധിക്കുകയും ഗതാഗതക്കുരുക്ക് ഒഴിവാക്കുന്നതിനായി ബദൽ റൂട്ടുകൾ ഉപയോഗിക്കുകയും ചെയ്യണമെന്ന് പൊതുഗതാഗത വകുപ്പ് അഭ്യർത്ഥിച്ചു. റോഡിലെ അറ്റകുറ്റപ്പണികൾ പൂർത്തിയാകുന്നതുവരെ യാത്രക്കാർ സഹകരിക്കണമെന്ന് അധികൃതർ അറിയിച്ചു.