/sathyam/media/media_files/2025/07/15/arrest-2025-07-15-21-30-49.jpg)
കുവൈത്ത് സിറ്റി: ലൈസൻസില്ലാത്ത ആയുധങ്ങളും വെടിയുണ്ടകളും മദ്യവും കൈവശം വെച്ചതിന് കുവൈത്തിൽ രണ്ട് പ്രൊഫഷണലുകൾ അറസ്റ്റിൽ.
എയർലൈൻസിൽ ഡോക്ടറായി ജോലി ചെയ്യുന്ന ഒരാളെയും ഒരു പൈലറ്റിനെയുമാണ് കുവൈത്ത് ആഭ്യന്തര മന്ത്രാലയം അറസ്റ്റ് ചെയ്തത്. രാജ്യത്തിന്റെ സുരക്ഷാ നിരീക്ഷണങ്ങളുടെ ഭാഗമായാണ് ഈ അറസ്റ്റ്.
കുവൈത്ത് അന്താരാഷ്ട്ര വിമാനത്താവളത്തിൽ വെച്ചാണ് ഡോക്ടറായ പ്രതിയെ സുരക്ഷാ സേന പിടികൂടിയത്. ഇയാളുടെ ലഗേജ് പരിശോധിച്ചപ്പോൾ 64 വെടിയുണ്ടകൾ കണ്ടെത്തുകയായിരുന്നു. ചോദ്യം ചെയ്യലിൽ, ഈ വെടിയുണ്ടകൾ താൻ കൈവശം വെച്ചതാണെന്നും, രണ്ടാമത്തെ പ്രതിയായ പൈലറ്റിൽ നിന്നാണ് അവ ലഭിച്ചതെന്നും ഡോക്ടർ സമ്മതിച്ചു.
ഇതിനെത്തുടർന്ന് പൈലറ്റിനെയും അറസ്റ്റ് ചെയ്യുകയായിരുന്നു. ഇവരുടെ പക്കൽ നിന്ന് മദ്യവും കണ്ടെത്തിയതായി അധികൃതർ അറിയിച്ചു.
ആഭ്യന്തര മന്ത്രാലയത്തിലെ വെപ്പൺസ് ഇൻവെസ്റ്റിഗേഷൻസ് ജനറൽ ഡിപ്പാർട്ട്മെന്റും റിസർച്ച് ആൻഡ് ഇൻവെസ്റ്റിഗേഷൻ വിഭാഗവും ചേർന്നാണ് ഈ പരിശോധന നടത്തിയത്.
നിയമവിരുദ്ധമായി ആയുധങ്ങൾ കൈവശം വെക്കുന്നവർക്കെതിരെ കർശന നടപടികൾ സ്വീകരിക്കുമെന്നും രാജ്യത്തിന്റെ ആഭ്യന്തര സുരക്ഷ ഉറപ്പാക്കുന്നതിനായി ഇത്തരം പരിശോധനകൾ തുടരുമെന്നും മന്ത്രാലയം വ്യക്തമാക്കി.