കുവൈത്തിൽ പുതിയ ഇലക്ട്രോണിക് വിസാ സംവിധാനം അവതരിപ്പിച്ചു. ഇ-വിസ ടൂറിസം മേഖലയ്ക്ക് പുത്തനുണർവേകും

കുവൈത്ത്: ടൂറിസം മേഖലയെ ശക്തിപ്പെടുത്തുന്നതിനായി പുതിയ ഇലക്ട്രോണിക് വിസാ സംവിധാനം അവതരിപ്പിച്ച് കുവൈത്ത് ആഭ്യന്തര മന്ത്രാലയം.

ഗവൺമെന്റ് കമ്മ്യൂണിക്കേഷൻ സെന്ററിൽ നടത്തിയ അവതരണത്തിൽ ജനറൽ ഡിപ്പാർട്ട്മെന്റ് ഓഫ് റെസിഡൻസി അഫയേഴ്സിലെ ഇലക്ട്രോണിക് സർവീസസ് ഡയറക്ടർ കേണൽ അബ്ദുൽഅസീസ് അൽ-കന്ദാരി പുതിയ വിസാ സിസ്റ്റത്തിന്റെ വിശദാംശങ്ങൾ പങ്കുവച്ചു.

ടൂറിസ്റ്റ് വിസയുടെ നാല് വിഭാഗങ്ങൾ:

1. ആദ്യ വിഭാഗം: 52 അംഗീകൃത രാജ്യങ്ങൾ — സുരക്ഷാ തടസ്സങ്ങളൊന്നുമില്ലാതെ, പ്രവേശന തീയതി മുതൽ ആറുമാസത്തിലേറെ കാലാവധി ശേഷിക്കുന്ന പാസ്‌പോർട്ട് നിർബന്ധം.

2. രണ്ടാം വിഭാഗം: ഗൾഫ് സഹകരണ കൗൺസിൽ (GCC) രാജ്യങ്ങളിലെ സാമ്പത്തിക ശേഷിയുള്ള തൊഴിൽ മേഖലയിൽ പ്രവർത്തിക്കുന്നവർ, കൂടാതെ അമേരിക്ക, യുകെ, യൂറോപ്യൻ യൂണിയൻ (ഷെൻഗൻ) രാജ്യങ്ങളിലെ താമസക്കാരും — സാധുവായ പാസ്‌പോർട്ടും താമസാനുമതിയും ആറുമാസത്തിലേറെ കാലാവധി ശേഷിക്കണം.

3. മൂന്നാം വിഭാഗം (ഇനിയും ആരംഭിച്ചിട്ടില്ല): ലോകത്തിലെ മറ്റു രാജ്യങ്ങളിൽ നിന്നുള്ള സാമ്പത്തിക ശേഷി തെളിയിക്കുന്ന അപേക്ഷകർ — പുതിയ ബാങ്ക് സ്റ്റേറ്റ്‌മെന്റ്, ഹോട്ടൽ ബുക്കിംഗ്, ക്രെഡിറ്റ് കാർഡിൽ നിന്ന് സുരക്ഷാ നിക്ഷേപം എന്നിവ നിർബന്ധം.

4. നാലാം വിഭാഗം: രാജ്യാന്തര, പ്രാദേശിക പരിപാടികളിലേക്കുള്ള വിസ — പരിപാടിയുടെ ആവശ്യാനുസരണം വ്യവസ്ഥകൾ.

വിസാ കാലാവധികൾ:

സിംഗിൾ എൻട്രി: 1, 2, 3 മാസം — 30 ദിവസം താമസാവധി.

മൾട്ടിപ്പിൾ എൻട്രി: 3 മാസം, 6 മാസം, 1 വർഷം — ഓരോ പ്രവേശനത്തിനും പരമാവധി 30 ദിവസം.

കുടുംബ സന്ദർശന വിസ:

സർട്ടിഫൈഡ് തർജ്ജുമാ ഓഫീസിലൂടെ അറബിയിലേക്കോ അറബിയിൽ നിന്നോ വിവർത്തനം ചെയ്ത ബന്ധ തെളിവുകൾ നിർബന്ധം. ബന്ധം നാലാം തലമുറയോളം (വിവാഹബന്ധത്തിൽ മൂന്നാം തലമുറ വരെ) അംഗീകരിക്കുന്നു. കാലാവധി സിംഗിൾ/മൾട്ടിപ്പിൾ എൻട്രി രീതിയിലായിരിക്കും.

വാണിജ്യ വിസ:

സ്വകാര്യ കമ്പനികൾ അല്ലെങ്കിൽ സ്ഥാപനങ്ങൾ ക്ഷണിക്കുന്ന ബിസിനസ് ആവശ്യങ്ങൾക്ക് — സിംഗിൾ/മൾട്ടിപ്പിൾ എൻട്രി.

സർക്കാർ വിസ:

സർക്കാർ സ്ഥാപനങ്ങൾ ഔദ്യോഗിക ആവശ്യങ്ങൾക്ക് ക്ഷണിക്കുന്നവർക്കായി — പ്രത്യേക വ്യവസ്ഥകളില്ല, ആവശ്യാനുസരണം അനുവദിക്കുന്നു.

കുവൈത്തിലെ പുതിയ ഇ-വിസ പ്ലാറ്റ്ഫോം, രാജ്യത്തെ ലോക ടൂറിസ്റ്റ് മാപ്പിൽ കൂടുതൽ ആകർഷകമാക്കുന്നതിന് ലക്ഷ്യമിടുന്നു.