പുതിയ പൊതുജനാരോഗ്യ മാനദണ്ഡങ്ങളുമായി കുവൈറ്റ്: അംഗീകാരം നൽകി ആരോഗ്യ മന്ത്രി

കുവൈറ്റ് സിറ്റി: കുവൈറ്റിലെ ആരോഗ്യ സ്ഥാപനങ്ങൾ, സലൂണുകൾ, സൗന്ദര്യവർദ്ധക-വ്യക്തിഗത പരിചരണ കേന്ദ്രങ്ങൾ എന്നിവയുടെ പ്രവർത്തനങ്ങൾക്കായി പുതിയ ആരോഗ്യ മാനദണ്ഡങ്ങൾ പുറത്തിറക്കി. 

പൊതുജനാരോഗ്യ സുരക്ഷ ഉറപ്പാക്കുക എന്ന ലക്ഷ്യത്തോടെയാണ് ഈ നടപടി. ആരോഗ്യ മന്ത്രി ഡോ. അഹമ്മദ് അബ്ദുൽ വഹാബ് അൽ-അവാദി ഈ മാനദണ്ഡങ്ങൾക്ക് അംഗീകാരം നൽകി.

പുതിയ മാർഗ്ഗനിർദ്ദേശങ്ങൾ അടങ്ങിയ കൈപ്പുസ്തകത്തിൽ, പകർച്ചവ്യാധി നിയന്ത്രണം, അണുനശീകരണം, പരിസ്ഥിതി സംരക്ഷണം, റേഡിയേഷൻ പ്രതിരോധം തുടങ്ങി 130-ലധികം കർശന വ്യവസ്ഥകളാണ് ഉൾപ്പെടുത്തിയിരിക്കുന്നത്. 

ആരോഗ്യ മന്ത്രാലയവും വാണിജ്യ-വ്യവസായ മന്ത്രാലയവും സംയുക്തമായി നടത്തിയ സഹകരണത്തിൻ്റെ ഫലമായാണ് ഈ സമഗ്രമായ മാർഗ്ഗനിർദ്ദേശങ്ങൾ തയ്യാറാക്കിയിട്ടുള്ളത്.

ഈ പുതിയ നിയമങ്ങൾ പ്രകാരം, രാജ്യത്തെ എല്ലാ ആരോഗ്യ സ്ഥാപനങ്ങളിലും സലൂണുകളിലും സൗന്ദര്യവർദ്ധക കേന്ദ്രങ്ങളിലും ആരോഗ്യ മന്ത്രാലയത്തിൻ്റെ കർശന നിരീക്ഷണം ഉണ്ടാകും. ഇത് പൊതുജനാരോഗ്യ സംരക്ഷണം കൂടുതൽ മെച്ചപ്പെടുത്താൻ സഹായിക്കുമെന്ന് അധികൃതർ അറിയിച്ചു.

ഹൃദയസ്തംഭനം സംഭവിച്ചവർക്ക് നൽകുന്ന സിപിആർ (Cardiopulmonary Resuscitation), ജീവൻ രക്ഷാ പരിശീലനം എന്നിവയിൽ പരിശീലനം ലഭിച്ച വ്യക്തികളുടെ സാന്നിധ്യം ഉറപ്പുവരുത്തുക, എല്ലാ സമയത്തും അംഗീകൃത ലൈഫ് ഗാർഡിൻ്റെ സേവനം നിർബന്ധമാക്കുക, 
​
ഉപകരണങ്ങൾ വൃത്തിയാക്കാനും അണുവിമുക്തമാക്കാനും കർശനമായ വ്യവസ്ഥകൾ പാലിക്കുക,
ഉറവിടം അറിയാത്ത സാധനങ്ങളോ സ്ഥിരമായ ടാറ്റൂ മെഷീനുകളോ ഉപയോഗിക്കുന്നത് നിരോധിക്കുക,
​കുട്ടികളുടെ സംരക്ഷണത്തിനായി പ്രത്യേക മുൻകരുതൽ നടപടികൾ സ്വീകരിക്കുക, അതിൽ മുടി ഡൈ ചെയ്യുന്നത് തടയുന്നതും ഉൾപ്പെടുന്നു.

​18 വയസ്സിൽ താഴെയുള്ളവർക്ക് ചർമ്മം ടാൻ ചെയ്യുന്നതിനുള്ള സേവനങ്ങൾ നൽകുന്നത് നിരോധിക്കുക.