കുവൈറ്റിൽ ആരോഗ്യ സ്ഥാപനങ്ങളുടെ പ്രവർത്തനത്തിന് പുതിയ മാർഗ്ഗനിർദ്ദേശങ്ങൾ: 18 വയസ്സിൽ താഴെയുള്ളവർക്ക് മുടി ഡൈ ചെയ്യാനും ടാനിങ്ങിനും വിലക്ക്

കുവൈറ്റ് സിറ്റി: രാജ്യത്തെ ആരോഗ്യ സ്ഥാപനങ്ങളുടെയും സലൂണുകളുടെയും സൗന്ദര്യവർദ്ധക കേന്ദ്രങ്ങളുടെയും പ്രവർത്തനങ്ങൾ കൂടുതൽ സുതാര്യവും സുരക്ഷിതവുമാക്കാൻ ലക്ഷ്യമിട്ട് കുവൈറ്റ് സർക്കാർ പുതിയ ആരോഗ്യ മാനദണ്ഡങ്ങൾ പുറത്തിറക്കി. 

ആരോഗ്യ മന്ത്രി ഡോ. അഹമ്മദ് അബ്ദുൽ വഹാബ് അൽ-അവാദി അംഗീകാരം നൽകിയ ഈ മാർഗ്ഗനിർദ്ദേശങ്ങൾ ആരോഗ്യ മന്ത്രാലയവും വാണിജ്യ-വ്യവസായ മന്ത്രാലയവും സംയുക്തമായാണ് തയ്യാറാക്കിയത്.

പൊതുജനാരോഗ്യ സംരക്ഷണം ഉറപ്പാക്കുക എന്ന ലക്ഷ്യത്തോടെ പുറത്തിറക്കിയ ഈ കൈപ്പുസ്തകത്തിൽ 130-ലധികം വ്യവസ്ഥകളാണ് ഉൾപ്പെടുത്തിയിരിക്കുന്നത്. അതിൽ ചില പ്രധാന തീരുമാനങ്ങൾ താഴെക്കൊടുക്കുന്നു:

* പരിശീലനം: ഹൃദയസംബന്ധമായ അത്യാഹിതങ്ങൾ കൈകാര്യം ചെയ്യുന്നതിനുള്ള സിപിആർ, ജീവൻ രക്ഷാ പരിശീലനം എന്നിവയിൽ പ്രാവീണ്യം നേടിയ വ്യക്തികളുടെ സാന്നിധ്യം ഉറപ്പാക്കണം. കൂടാതെ, എല്ലാ സമയത്തും അംഗീകൃത ലൈഫ് ഗാർഡിൻ്റെ സേവനവും നിർബന്ധമാണ്.

* സുരക്ഷാ മാനദണ്ഡങ്ങൾ: ഉപകരണങ്ങൾ വൃത്തിയാക്കാനും അണുവിമുക്തമാക്കാനും കർശനമായ വ്യവസ്ഥകൾ പാലിക്കണം. ഉറവിടം അറിയാത്ത സാധനങ്ങളോ സ്ഥിരമായ ടാറ്റൂ മെഷീനുകളോ ഉപയോഗിക്കുന്നത് പൂർണ്ണമായി നിരോധിച്ചു.

* കുട്ടികളുടെ സംരക്ഷണം: കുട്ടികളുടെ സുരക്ഷ ഉറപ്പാക്കാൻ പ്രത്യേക മുൻകരുതൽ നടപടികൾ സ്വീകരിക്കണം. 18 വയസ്സിൽ താഴെയുള്ളവർക്ക് മുടി ഡൈ ചെയ്യുന്നതിനും ചർമ്മം ടാൻ ചെയ്യുന്നതിനും (Skin Tanning) സേവനങ്ങൾ നൽകുന്നത് പുതിയ നിയമം അനുസരിച്ച് നിരോധിച്ചിട്ടുണ്ട്.

പുതിയ മാർഗ്ഗനിർദ്ദേശങ്ങൾ രാജ്യത്തെ ആരോഗ്യ മേഖലയിലെ സേവനങ്ങളുടെ നിലവാരം ഉയർത്തുമെന്നും പൊതുജനങ്ങളുടെ സുരക്ഷ ഉറപ്പാക്കുമെന്നും അധികൃതർ അറിയിച്ചു. ഈ നിയമങ്ങൾ സ്ഥാപനങ്ങളുടെ പ്രവർത്തനങ്ങളിൽ കർശനമായ ആരോഗ്യ നിരീക്ഷണം ഉറപ്പാക്കും.