ജയിൽ മോചിതനായി പുറത്തിറങ്ങി വനിതാ ഡോക്ടറുടെ വാഹനം മോഷ്ടിച്ചു, പ്രതിക്ക് 5 വർഷം തടവ്

കുവൈറ്റ് സിറ്റി: ഒരു കുവൈറ്റ് ഡോക്ടറുടെ വാഹനം മോഷ്ടിച്ച കേസിൽ കുറ്റാരോപിതനായ ഒരു പൗരന് ക്രിമിനൽ കോടതി അഞ്ചു വർഷം തടവ് ശിക്ഷ വിധിച്ചു. ജയിലിൽ നിന്ന് പുറത്തിറങ്ങി രണ്ട് ദിവസത്തിന് ശേഷമാണ് പ്രതി ഈ കുറ്റകൃത്യം ചെയ്തത്.

2025 ഫെബ്രുവരിയിൽ രാജകീയ പൊതുമാപ്പ് ലഭിച്ച് ജയിൽ മോചിതനായതിന് പിന്നാലെയാണ് പ്രതി ഡോക്ടറുടെ വാഹനം മോഷ്ടിച്ചത്. ഡോക്ടറെയും അവരുടെ ഡ്രൈവറെയും ഭീഷണിപ്പെടുത്തിയാണ് പ്രതി വാഹനം തട്ടിയെടുത്തത്. ഭീഷണിയെ തുടർന്ന് ഇരുവരും വാഹനത്തിൽ നിന്ന് ഇറങ്ങാൻ നിർബന്ധിതരായി.

വാഹനം മോഷ്ടിച്ച ശേഷം പ്രതി അതിൻ്റെ ചില്ലുകൾ കറുപ്പിച്ചതായി അന്വേഷണത്തിൽ കണ്ടെത്തി. ഒരാഴ്ചയിലധികം ഇയാൾ വാഹനം തൻ്റെ കൈവശം വെക്കുകയും ചെയ്തു. തെളിവുകളുടെ അടിസ്ഥാനത്തിൽ കോടതി പ്രതി കുറ്റക്കാരനാണെന്ന് കണ്ടെത്തുകയും അഞ്ചു വർഷം തടവ് ശിക്ഷ വിധിക്കുകയും ചെയ്തു.