കുവൈറ്റിൽ വീട്ടിൽ സംഭവിക്കാവുന്ന അപകടങ്ങളിൽ നിന്ന് കുട്ടികളെ സംരക്ഷിക്കാൻ മാർഗ്ഗനിർദ്ദേശങ്ങളുമായി ഫയർ ഫോഴ്സ്

കുവൈറ്റ്: വീട്ടിൽ സംഭവിക്കാവുന്ന അപകടങ്ങളിൽ നിന്ന് കുട്ടികളെ സംരക്ഷിക്കാൻ കർശന സുരക്ഷാ മാർഗ്ഗനിർദ്ദേശങ്ങളുമായി കുവൈറ്റ് ജനറൽ ഫയർ ഫോഴ്സ് രംഗത്ത്. 

കുട്ടികളെ ശ്രദ്ധിക്കാതെ ഒറ്റയ്ക്ക് വിടരുതെന്നും, സുരക്ഷാ മുൻകരുതലുകൾ എടുക്കേണ്ടത് രക്ഷിതാക്കളുടെ പ്രധാന ഉത്തരവാദിത്തമാണെന്നും ഫയർ ഫോഴ്സ് ഓർമ്മിപ്പിച്ചു.

പബ്ലിക് റിലേഷൻസ് ഡിപ്പാർട്ട്‌മെൻ്റ് പുറത്തിറക്കിയ അറിയിപ്പനുസരിച്ച്, വീട്ടു അപകടങ്ങൾക്ക് ഏറ്റവും കൂടുതൽ ഇരയാകുന്നത് കുട്ടികളാണ്. വൈദ്യുത ഉപകരണങ്ങളും ചൂടുള്ള വസ്തുക്കളും പോലുള്ള അപകടസാധ്യതകൾ വർധിച്ച സാഹചര്യത്തിൽ, മുതിർന്നവരുടെ നിരന്തരമായ ശ്രദ്ധ അനിവാര്യമാണ്.

ഫയർ ഫോഴ്സ് നിർദ്ദേശിച്ച പ്രധാന സുരക്ഷാ മാർഗ്ഗനിർദ്ദേശങ്ങൾ:

 * തീപിടിക്കുന്ന വസ്തുക്കൾ: തീപ്പെട്ടി, ലൈറ്റർ തുടങ്ങിയ തീപിടിക്കുന്ന വസ്തുക്കൾ കുട്ടികൾക്ക് കൈയ്യെത്താത്ത സ്ഥലങ്ങളിൽ സൂക്ഷിക്കുക.

 * വൈദ്യുതിയും ചൂടും: ഇലക്ട്രിക് സ്വിച്ചുകളിലും ചൂടുള്ള ഉപകരണങ്ങളുടെ അടുത്തേക്കും കുട്ടികളെ പോകാൻ അനുവദിക്കരുത്.

* നീന്തൽക്കുളം: നീന്തൽക്കുളങ്ങളിൽ കുട്ടികളെ ഒരിക്കലും തനിച്ചാക്കി പോകരുത്.

* ലിഫ്റ്റ്: ലിഫ്റ്റുകൾ ഉപയോഗിക്കുമ്പോൾ മുതിർന്നവർ കുട്ടികളുടെ കൂടെ ഉണ്ടാകണം. അവരെ ഒറ്റയ്ക്ക് കയറാൻ അനുവദിക്കരുത്.

അപകടങ്ങൾ തടയേണ്ടത് എല്ലാവരുടെയും കൂട്ടായ ഉത്തരവാദിത്തമാണെന്നും, അതിന് തുടക്കം കുറിക്കേണ്ടത് വീട്ടിൽ നിന്നാണെന്നും ഫയർ ഫോഴ്സ് വ്യക്തമാക്കി. ഈ മാർഗ്ഗനിർദ്ദേശങ്ങൾ പാലിച്ച് കുട്ടികളുടെ സുരക്ഷ ഉറപ്പാക്കാൻ രക്ഷിതാക്കൾ സഹകരിക്കണമെന്നും അവർ അഭ്യർത്ഥിച്ചു.