പുതിയ അധ്യയന വർഷത്തിന് മുന്നോടിയായി വിദ്യാലയങ്ങളിൽ ശുചീകരണ യജ്ഞവുമായി കുവൈറ്റ് ആരോഗ്യ മന്ത്രാലയം

കുവൈറ്റ് സിറ്റി: പുതിയ അധ്യയന വർഷം ആരംഭിക്കുന്നതിന് മുന്നോടിയായി വിദ്യാലയങ്ങളിൽ ശുചീകരണ പ്രവർത്തനങ്ങളും കീടനിയന്ത്രണവും ലക്ഷ്യമിട്ട് ആരോഗ്യ മന്ത്രാലയം വിപുലമായ പ്രചാരണ പരിപാടികൾക്ക് തുടക്കമിട്ടു. 

രാജ്യത്തെ 915 വിദ്യാലയങ്ങളിൽ ഈ സമഗ്ര ശുചീകരണ യജ്ഞം നടപ്പാക്കാനാണ് മന്ത്രാലയം ലക്ഷ്യമിടുന്നത്. എല്ലാ ഗവർണറേറ്റുകളിലെയും വിദ്യാലയങ്ങൾ ഈ പദ്ധതിയിൽ ഉൾപ്പെടും.

വിദ്യാർത്ഥികൾക്കും അധ്യാപകർക്കും സുരക്ഷിതവും ആരോഗ്യകരവുമായ പഠനാന്തരീക്ഷം ഒരുക്കുകയാണ് ഈ കാമ്പെയ്‌ന്റെ പ്രധാന ലക്ഷ്യം. ഇതിനായി സുരക്ഷിതമായ കീടനിയന്ത്രണ മാർഗ്ഗങ്ങൾ മാത്രമാണ് ഉപയോഗിക്കുക.

കൂടാതെ, കുവൈറ്റിലെ വിവിധ പ്രദേശങ്ങളിൽ രോഗങ്ങൾക്കും കീടങ്ങൾക്കും കാരണമാകുന്ന ഘടകങ്ങൾ ഇല്ലാതാക്കുന്നതിനുള്ള പരിസ്ഥിതി ശുചിത്വ യജ്ഞങ്ങളും തുടരും. 

പൊതുജനങ്ങൾക്ക് പ്രാണികളെയും എലികളെയും സംബന്ധിച്ച പരാതികൾ അറിയിക്കുന്നതിനായി 24 മണിക്കൂറും പ്രവർത്തിക്കുന്ന 151 എന്ന ഹോട്ട്‌ലൈൻ നമ്പർ മന്ത്രാലയം ഒരുക്കിയിട്ടുണ്ട്.