കുവൈറ്റിൽ പാസ്‌പോർട്ട് ഫോട്ടോകൾക്കായി ഐ.സി.എ.ഒ മാർഗ്ഗനിർദേശങ്ങൾ നിർബന്ധമാക്കി

കുവൈറ്റ്: പാസ്‌പോർട്ട് അപേക്ഷകൾക്കായി സമർപ്പിക്കുന്ന ഫോട്ടോകൾ അന്താരാഷ്ട്ര സിവിൽ എവിയേഷൻ ഓർഗനൈസേഷൻ (ICAO) മാനദണ്ഡങ്ങൾ പാലിച്ചിരിക്കണമെന്ന് അധികൃതർ അറിയിച്ചു.

പുതിയ മാർഗ്ഗനിർദേശങ്ങൾ പ്രകാരം, ഫോട്ടോയിൽ മുഖം 80 മുതൽ 85 ശതമാനം വരെ ഭാഗം ഉൾക്കൊള്ളണമെന്നും, ചിത്രത്തിന്റെ വലുപ്പം 630x810 പിക്സൽ ആയിരിക്കണമെന്നും വ്യക്തമാക്കിയിട്ടുണ്ട്. ഫോട്ടോ കളറിൽ ആയിരിക്കണം, പശ്ചാത്തലം വെളുത്ത നിറത്തിലുള്ളത് മാത്രമേ അനുവദിക്കൂ.

അപേക്ഷകൻ നേരിട്ട് ക്യാമറയിൽ നോക്കിയിരിക്കണം, കണ്ണുകൾ തുറന്നും വ്യക്തമായും കാണിക്കണം. മുഖത്ത് നിഴലോ ലൈറ്റിന്റെ പ്രതിഫലനങ്ങളോ ‘റെഡ് ഐ’ പ്രശ്നമോ ഉണ്ടാകരുതെന്നും, വായ അടച്ചിരിക്കണമെന്നും നിർദേശത്തിൽ പറയുന്നു. തല ഫ്രെയിമിനുള്ളിൽ കേന്ദ്രീകരിച്ചിരിക്കണം, മുടിയുടെ മുകളിൽ നിന്ന് താടി വരെയുള്ള മുഴുവൻ ഭാഗവും വ്യക്തമായി ഉൾപ്പെടുത്തണം.

കണ്ണടയിൽ പ്രതിഫലനം ഒഴിവാക്കാൻ ചിത്രമെടുക്കുമ്പോൾ അത് നീക്കണമെന്നും, മതപരമായ കാരണങ്ങൾ ഒഴികെ തല മൂടൽ അനുവദനീയമല്ലെന്നും നിർദേശങ്ങൾ വ്യക്തമാക്കുന്നു. എന്നാൽ മതപരമായ തല മൂടൽ ഉണ്ടെങ്കിൽ പോലും, താടിയുടെ അടിഭാഗം മുതൽ നെറ്റിയുടെ മുകളിൽ വരെയും ഇരുവശങ്ങളിലുമുള്ള മുഖഭാഗങ്ങളും വ്യക്തമായി കാണിക്കണം.