കല(ആര്‍ട്ട്) കുവൈത്ത് ഒരുക്കുന്ന 'നിറം 2024' ശിശുദിന ചിത്രരചന മത്സരം ഡിസം. ആറിന്‌

കുവൈറ്റ് സിറ്റി: കുവൈറ്റിലെ പ്രമുഖ സാംസ്‌കാരിക സംഘടനയായ കല(ആര്‍ട്ട്) കുവൈറ്റ് ശിശുദിനത്തോടനുബന്ധിച്ച് കുവൈറ്റിലെ ഇന്ത്യൻ സ്‌കൂൾ കൂട്ടികൾക്കായി അമേരിക്കൻ ടൂറിസ്റ്ററുമായി സഹകരിച്ചു സംഘടിപ്പിക്കുന്ന "നിറം 2024" ചിത്ര രചനാ മത്സരം ഡിസംബർ 6 ന് വെള്ളിയാഴ്‌ച ഖൈത്താൻ ഇന്ത്യൻ കമ്മ്യൂണിറ്റി സ്‌കൂളിൽ ഉച്ചയ്ക്ക് ശേഷം രണ്ടുമണിക്ക് ആരംഭിക്കും.

ശിശുദിനത്തിന്റെ ഭാഗമായി, പ്രഥമ ഇന്ത്യൻ പ്രധാനമന്ത്രി പണ്ഡിറ്റ് ജവഹർലാൽ നെഹ്രുവിന്റെ 104-ആം ജന്മദിനത്തോടനുബന്ധിച്ചാണ് കല (ആർട്ട്) കുവൈറ്റ് കൂട്ടികൾക്കായി പരിപാടി സംഘടിപ്പിച്ചിരിക്കുന്നത്.

2005 മുതല്‍ "നിറം" എന്ന നാമകരണത്തില്‍ല്‍ വിജയകരമായി സംഘടിപ്പിച്ചുവരുന്ന ഈ പരിപാടിയുടെ 20-ആം വാർഷികമാണ് ഈ വർഷം നടക്കുന്നത്. ഡ്രോയിംഗിലും പെയിന്റിംഗിലുമായി നാല് ഗ്രൂപ്പുകളിലായിരിക്കും മത്സരം നടത്തുക.

ഗ്രൂപ്പ് എ - എല്‍കെജി മുതല്‍ ഒന്നാം ക്ലാസ് വരെ, 

ഗ്രൂപ്പ് ബി-രണ്ടാം ക്ലാസ് മുതല്‍ നാല് വരെ. 

ഗ്രൂപ്പ് സി-അഞ്ചാം ക്ലാസ് മുതല്‍ ഏഴ് വരെ 

ഗ്രൂപ്പ് ഡി - എട്ടാം ക്ലാസ് മുതല്‍ പന്ത്രണ്ടാം ക്ലാസ് വരെ. 

ആദ്യത്തെ രണ്ടു ഗ്രൂപ്പുകള്‍ക്ക് ക്രയോണ്‍സും കളർപെൻസിലും ഗ്രൂപ്പ് സി. ഡി എന്നിവർക്ക് വാട്ടര്‍ കളറുകളും ഉപയോഗിക്കാം. ഇത് മത്സരാര്‍ത്ഥികള് കൊണ്ടുവരേണ്ടതാണ്. ഡ്രോയിംഗ് ഷീറ്റ് സംഘാടകർ നല്‍കും.

 ചിത്രരചന കൂടാതെ ഏഴാം ക്ലാസ് മുതല്‍ പന്ത്രണ്ടാം ക്ലാസ് വരെയുള്ള കുട്ടികള്‍ക്കായി ക്ലേ സ്‌കൾപ്‌ചർ മത്സരവും, രക്ഷിതാക്കള്‍ക്കും സന്ദര്‍ശകര്‍ക്കും പങ്കെടുക്കാവുന്ന ഓപ്പൺ ക്യാൻവാസ് പെയിന്റിംഗും ഒരുക്കിയിട്ടുണ്ട്. ഓപ്പൺ ക്യാൻവാസ് മത്സരത്തിൽ പങ്കെടുക്കുന്നവര്‍ക്കും സമ്മാനം നേടാൻ അവസരം ഉണ്ടായിരിക്കുന്നതാണ്.

ഒന്നാം സമ്മാനം നേടുന്നവർക്ക് സ്വർണ നാണയം സമ്മാനമായി പ്രഖ്യാപിച്ചിട്ടുണ്ട്. രണ്ടും മൂന്നും സമ്മാനങ്ങൾക്കുപുറമെ 75 പേർക്ക് മെറിറ്റ് പ്രൈസൂം 10 ശതമാനം പേർക്ക് പ്രോത്സാഹന സമ്മാനവും നൽകുന്നതാണ്.

ഓണ്‍ലൈന്‍ രജിസ്‌ട്രേഷന്‍ ഡിസം. മൂന്ന് വരെ www.kalakuwait.net എന്ന വെബ്സൈറ്റിലൂടെ ചെയ്യാവുന്നതാണ്. ഓൺസ്പോട്ട് രജി‌സ്ട്രേഷനും ഉണ്ടായിരിക്കും. കൂടുതൽ വിവരങ്ങൾക്ക് kalakuwait@gmail.com എന്ന ഇ-മെയിൽ വഴിയും കൂടാതെ 67042514, 66114364, 66015466, 97219439 എന്നീ നമ്പറുകൾ വഴിയും ബന്ധപ്പെടാവുന്നതാണ്. കൂവൈറ്റിലെ പ്രഗത്ഭ ആർട്ടിസ്റ്റുകൾ മത്സരം നിയന്ത്രിക്കും.

വാർത്താസമ്മേളനത്തിൽ കല(ആർട്ട്) കുവൈറ്റ് പ്രസിഡന്റ് ശിവകുമാർ, ജനറൽ സെക്രട്ടറി അനിഷ് വർഗീസ്, നിറം ജനറൽ കൺവീനർ രാകേഷ് പി. ഡി. ട്രഷറർ അജിത് കുമാർ, പബ്ലിക് റിലേഷൻ കൺവിനർ മുകേഷ്, മിഡിയ കൺവീനർ മുസ്‌തഫ, അമേരിക്കൻ ടൂറിസ്റ്റർ മാർക്കറ്റിംഗ് മാനേജർ ഹബീബ്‌, രജിസ്ട്രേഷൻ കൺവീനർ സുനിൽ കുമാർ എന്നിവർ പങ്കെടുത്തു.