ജഹ്‌റയില്‍ പുതിയ കോണ്‍സുലര്‍ ആപ്ലിക്കേഷന്‍ സെന്റര്‍; കുവൈത്തിലെ ഇന്ത്യന്‍ സ്ഥാനപതി ഉദ്ഘാടനം ചെയ്തു

കുവൈത്ത് സിറ്റി: കുവൈത്തിലെ ഇന്ത്യന്‍ സ്ഥാനപതി ഡോ. ആദർശ് സ്വൈക ജഹ്‌റയിലെ പുതിയ ഇന്ത്യന്‍ കോണ്‍സുലര്‍ ആപ്ലിക്കേഷന്‍ സെന്റര്‍ (ഐസിഎസി) ഉദ്ഘാടനം ചെയ്തു. എംബസിയുടെ ഔട്ട്‌സോഴ്‌സിംഗ് പങ്കാളിയായ എം/എസ് ബിഎൽഎസ് ഇൻ്റർനാഷണലാണ് പുതിയ ഐസിഎസിയും നിയന്ത്രിക്കുന്നത്. കുവൈത്തിലെ ഇത്തരത്തിലുള്ള നാലാമത്തെ ഐസിഎസിയാണ് ജഹ്‌റ ഐസിഎസി. മറ്റ് മൂന്നെണ്ണം കുവൈത്ത് സിറ്റി, ഫഹാഹീൽ, ജിലീബ് എന്നിവിടങ്ങളിലാണ് സ്ഥിതി ചെയ്യുന്നത്.

ജഹ്‌റയിലെ അല്‍ ഖലീഫ ബില്‍ഡിംഗിലാണ് പുതിയ കേന്ദ്രം സ്ഥിതി ചെയ്യുന്നത്. കോൺസുലർ, പാസ്‌പോർട്ട്, വിസ സേവനങ്ങള്‍ക്കായി ഏപ്രില്‍ ഒന്ന് മുതല്‍ പ്രവര്‍ത്തനം ആരംഭിച്ചു. ശനി മുതല്‍ വ്യാഴം വരെ രാവിലെ ഒമ്പത് മുതല്‍ ഉച്ചയ്ക്ക് രണ്ട് വരെയാണ് പ്രവര്‍ത്തനസമയം. 

ജഹ്‌റയിലും അബ്ദാലി വരെയുള്ള പ്രദേശങ്ങളിലും താമസിക്കുന്ന ഇന്ത്യൻ പൗരന്മാർക്ക് (പൊതുമാപ്പുമായി ബന്ധപ്പെട്ട യാത്രാ രേഖകൾ ഉൾപ്പെടെ) വിവിധ കോൺസുലർ സേവനങ്ങളും കുവൈത്ത് സ്വദേശികള്‍ക്ക്‌ ഇന്ത്യൻ വിസകളും സുഗമമാക്കുന്നതിനുള്ള മറ്റൊരു ചുവടുവയ്പ്പാണ് ജഹ്‌റ ഐസിഎസി. പുതിയ സൗകര്യം അപേക്ഷാ പ്രക്രിയയെ കൂടുതൽ കാര്യക്ഷമമാക്കുകയും കാത്തിരിപ്പ് സമയം കുറയ്ക്കുകയും എല്ലാ അപേക്ഷകർക്കും തടസ്സമില്ലാത്ത അനുഭവം ഉറപ്പാക്കുകയും ചെയ്യുമെന്ന് പ്രതീക്ഷിക്കുന്നു.

പൊതുസേവനങ്ങൾ തടസ്സരഹിതവും സാങ്കേതികവിദ്യാധിഷ്ഠിതവുമാക്കാനുള്ള ഇന്ത്യൻ സർക്കാരിൻ്റെ ഉറച്ച പ്രതിബദ്ധതയുടെ ഭാഗമാണിത്.  ഇന്ത്യയിലേക്കുള്ള കുവൈത്ത് സന്ദർശകരുടെ എണ്ണം വർഷങ്ങളായി വർദ്ധിച്ചുകൊണ്ടിരിക്കുകയാണ്. കുവൈത്ത് സ്വദേശികള്‍ക്ക് ഉള്‍പ്പെടെ എംബസി മൾട്ടിപ്പിൾ എൻട്രി ഇന്ത്യൻ ടൂറിസ്റ്റ് വിസകൾ സാധാരണയായി ഒരു ദിവസത്തിനുള്ളിൽ നൽകുന്നു. 2023ൽ ഏകദേശം 10000 വിസകളാണ് എംബസി നൽകിയത്.

പുതിയ കോൺസുലാർ ആപ്ലിക്കേഷൻ സെൻ്ററിൽ വാഗ്ദാനം ചെയ്യുന്ന സേവനങ്ങളെക്കുറിച്ചുള്ള കൂടുതൽ വിവരങ്ങൾക്കും അപ്‌ഡേറ്റുകൾക്കും, എംബസിയുടെ ഔദ്യോഗിക വെബ്‌സൈറ്റ് (www.indembkwt.gov.in) അല്ലെങ്കിൽ M/s BLS-ൻ്റെ വെബ്‌സൈറ്റ് (www.blsinternational.com/india/kuwait/) സന്ദർശിക്കാം.

ജഹ്‌റയിലെ ഐസിഎസിയുടെ വിലാസം: Building No. 27, Al Khalifa building, 2^nd floor, Office 3 & 14, Block No. 93, Jahra, Kuwait