പൊതുഗതാഗതം മെച്ചപ്പെടുത്തുക ലക്ഷ്യം; കുവൈത്തില്‍ സുപ്രീം ട്രാഫിക് കൗണ്‍സില്‍ യോഗം ചേര്‍ന്നു

കുവൈത്ത് സിറ്റി: കുവൈത്തില്‍ സുപ്രീം ട്രാഫിക് കൗണ്‍സില്‍ യോഗം ചേര്‍ന്നു. ആഭ്യന്തര മന്ത്രാലയം അണ്ടർ സെക്രട്ടറി ലെഫ്റ്റനൻ്റ് ജനറൽ ഷെയ്ഖ് സലേം അൽ നവാഫ് അധ്യക്ഷത വഹിച്ചു. ആഭ്യന്തര മന്ത്രാലയത്തിൽ നടന്ന യോഗത്തിൽ ട്രാഫിക് മാനേജ്‌മെൻ്റുമായി ബന്ധപ്പെട്ട വിവിധ മന്ത്രാലയങ്ങളിലെയും ഏജൻസികളിലെയും അംഗങ്ങൾ പങ്കെടുത്തു.

ലെഫ്റ്റനൻ്റ് ജനറൽ അൽ നവാഫ് പങ്കെടുത്തവരെ സ്വാഗതം ചെയ്യുകയും പ്രഥമ ഉപപ്രധാനമന്ത്രിയും പ്രതിരോധ മന്ത്രിയും ആഭ്യന്തര മന്ത്രിയുമായ ഷെയ്ഖ് ഫഹദ് അൽ യൂസഫിൻ്റെ ആശംസകളും അഭിനന്ദനങ്ങളും അറിയിക്കുകയും ചെയ്തു. 

ഗതാഗതക്കുരുക്കും അനുബന്ധ പ്രശ്‌നങ്ങളും പരിഹരിക്കുന്നതിന് ഫലപ്രദവും പ്രായോഗികവുമായ പരിഹാരങ്ങൾ ആവിഷ്‌കരിക്കുന്നതിന് അദ്ദേഹം കൗണ്‍സില്‍ അംഗങ്ങളെ പ്രശംസിച്ചു.

സുപ്രിം ട്രാഫിക് കൗൺസിൽ സെക്രട്ടറിയും പബ്ലിക് ട്രാൻസ്‌പോർട്ട് കമ്മിറ്റി ചെയർമാനുമായ ബ്രിഗേഡിയർ സലേം അൽ അജ്മി യോഗത്തില്‍ ദൃശ്യാവതരണം നടത്തി. കുവൈത്തിലെ പൊതുഗതാഗത സേവനങ്ങളെ, പ്രത്യേകിച്ച് ബസുകളെ ബാധിക്കുന്ന വെല്ലുവിളികളെയും പോരായ്മകളെയും കുറിച്ചുള്ള കമ്മിറ്റിയുടെ കണ്ടെത്തലുകൾ അദ്ദേഹം ചൂണ്ടിക്കാട്ടി. പൊതുഗതാഗത സേവനങ്ങൾ മെച്ചപ്പെടുത്താൻ ലക്ഷ്യമിട്ടുള്ള സമിതിയുടെ നിർദേശങ്ങളും ശുപാർശകളും അദ്ദേഹം വിശദീകരിച്ചു.

റോഡുകൾക്കും ഇൻ്റർസെക്‌ഷനുകൾക്കുമുള്ള നൂതന എഞ്ചിനീയറിംഗ് പരിഹാരങ്ങള്‍, പൊതുബോധവൽക്കരണം, വിദ്യാഭ്യാസ സംരംഭങ്ങൾ, ട്രാഫിക് പിഴകൾ കർശനമായി നടപ്പാക്കൽ എന്നിവ ഉൾപ്പെടെ ട്രാഫിക് മെച്ചപ്പെടുത്തുന്നതിനായി രൂപകൽപ്പന ചെയ്‌തിരിക്കുന്ന എല്ലാ നിർദ്ദേശങ്ങളും വിലയിരുത്തണമെന്ന്‌ ലെഫ്റ്റനൻ്റ് ജനറൽ അൽ നവാഫ് പറഞ്ഞു.