ഉഭയകക്ഷി വ്യാപാര പ്രോത്സാഹന പരിപാടികൾ സംഘടിപ്പിക്കാനൊരുങ്ങി കുവൈത്തിലെ ഇന്ത്യൻ എംബസി; സെപ്റ്റംബർ 8 മുതൽ 10 വരെ

കുവൈത്ത് സിറ്റി: കുവൈത്തിലെ ഇന്ത്യൻ എംബസി സെപ്റ്റംബർ 8 മുതൽ 10 വരെ കുവൈത്തിൽ ഭക്ഷണം, കാർഷിക, പാനീയ മേഖലകളിൽ ഉഭയകക്ഷി വ്യാപാര പ്രോത്സാഹന പരിപാടികൾ സംഘടിപ്പിക്കും. 

സെപ്റ്റംബർ 8 ന് കുവൈത്ത് സിറ്റിയിലെ ഹോട്ടൽ ഗ്രാൻഡ് മജസ്റ്റിക്സിൽ ഒരു അപെക്‌സ് ട്രേഡ് ആൻഡ് ഇൻവെസ്റ്റ്‌മെൻ്റ് പ്രൊമോഷൻ ഓർഗനൈസേഷൻ ഫുഡ് ആൻഡ് ബിവറേജസ് (എഫ് ആൻഡ് ബി) മേഖലയിൽ ഒരു എക്സ്ക്ലൂസീവ് ബയർ സെല്ലർ മീറ്റ് (ബിഎസ്എം) സംഘടിപ്പിക്കും. എംബസി, ട്രേഡ് പ്രമോഷൻ കൗൺസിൽ ഓഫ് ഇന്ത്യ എന്നിവയുടെ സഹകരണത്തോടെയാണ് ഇത് സംഘടിപ്പിക്കുന്നത്.

10 പ്രമുഖ ഇന്ത്യൻ എഫ് ആൻഡ് ബി കമ്പനികളുടെ പ്രതിനിധി സംഘം ബിഎസ്എമ്മിൽ വൈവിധ്യമാർന്ന ഉൽപ്പന്നങ്ങൾ പ്രദർശിപ്പിക്കും. 

ഫെഡറേഷൻ ഓഫ് ഇന്ത്യൻ എക്‌സ്‌പോർട്ട് ഓർഗനൈസേഷൻസ് (എഫ്ഐഇഒ), കുവൈത്ത് ചേംബർ ഓഫ് കൊമേഴ്‌സ് ആൻഡ് ഇൻഡസ്ട്രി (കെസിസിഐ) എന്നിവയുടെ സഹകരണത്തോടെ എംബസി സെപ്റ്റംബർ 9-10 തീയതികളിൽ കെസിസിഐ എക്‌സിബിഷന്‍ ഹാളില്‍ ഭക്ഷ്യ-കാർഷിക ഉൽപന്നങ്ങളുടെ മേഖലയിൽ ഒരു ബയർ-സെല്ലർ മീറ്റ് സംഘടിപ്പിക്കും.

30 ഓളം ഇന്ത്യൻ കമ്പനികളുടെ പ്രതിനിധി സംഘം ഇന്ത്യൻ ഭക്ഷ്യ-കാർഷിക മേഖലകളിലെ ഏറ്റവും പുതിയ ട്രെൻഡുകളും കണ്ടുപിടിത്തങ്ങളും  ഭക്ഷ്യ സംസ്കരണം, ഫുഡ് പാക്കേജിംഗ് തുടങ്ങിയവ ഉൾപ്പെടുന്ന ഈ പരിപാടിയിൽ പ്രദർശിപ്പിക്കും.

രണ്ട് പരിപാടികളും യഥാക്രമം ഹോട്ടൽ ഗ്രാൻഡ് മജസ്റ്റിക്, കെസിസിഐ എക്‌സിബിഷൻ ഹാൾ എന്നിവിടങ്ങളിൽ കുവൈറ്റിലെ ഇന്ത്യൻ സ്ഥാനപതി ഡോ.ആദർശ് സ്വൈക ഉദ്ഘാടനം ചെയ്യും.

ജൈവകൃഷി, ഭക്ഷ്യസുരക്ഷാ മാനദണ്ഡങ്ങൾ, സുസ്ഥിര കാർഷിക രീതികൾ എന്നിവയിലെ പുരോഗതികൾ നിർദ്ദിഷ്ട ബിഎസ്എമ്മുകൾ അവതരിപ്പിക്കും.

ഫോർട്ടിഫൈഡ് ഫുഡുകൾ, നൂതന ഭക്ഷ്യ സംരക്ഷണ സാങ്കേതികവിദ്യകൾ എന്നിവ പോലുള്ള ഉൽപ്പന്ന നവീകരണങ്ങൾ സന്ദർശകർക്ക് കാണാൻ കഴിയും. 

കുവൈറ്റിലെ പ്രമുഖ ഇറക്കുമതിക്കാർ, ഹൈപ്പർമാർക്കറ്റുകൾ, റീട്ടെയിൽ സ്റ്റോറുകൾ എന്നിവരുമായി സന്ദർശനം നടത്തുന്ന പ്രതിനിധികൾ ബി2ബി മീറ്റിംഗുകളും നടത്തും. ഇന്ത്യൻ ബിസിനസ് പ്രൊഫഷണൽസ് കൗൺസിൽ (ഐബിപിസി) സംഘടിപ്പിക്കുന്ന ബിസിനസ് നെറ്റ്‌വർക്കിംഗ് സെഷനിൽ എഫ്ഐഇഒ പ്രതിനിധികളും പങ്കെടുക്കും.