കുവൈത്തിൽ വിസിറ്റ് വിസ റെസിഡൻസി വിസയിലേക്ക് മാറ്റാൻ അനുമതി; 'ആർട്ടിക്കിൾ 16' പ്രകാരം വിസ മാറ്റം അനുവദിക്കുക അഞ്ച് സാഹചര്യങ്ങളിൽ

കുവൈത്ത് സിറ്റി: കുവൈത്തിൽ നിലവിൽ വിസിറ്റ് വിസയിൽ (സന്ദർശക വിസ) രാജ്യത്ത് എത്തിച്ചേർന്ന ചിലർക്ക് അവരുടെ വിസ സാധാരണ റെസിഡൻസി പെർമിറ്റുകളാക്കി (ഇഖാമ) മാറ്റാൻ അനുമതി നൽകിയിരിക്കുന്നു. 

അസാധാരണമായതോ പ്രായോഗികമായതോ ആയ സാഹചര്യങ്ങൾ പരിഗണിച്ച്, ആർട്ടിക്കിൾ 16 പ്രകാരം അഞ്ച് പ്രത്യേക സാഹചര്യങ്ങളിലാണ് വിസ മാറ്റം അനുവദിക്കുക.

റെസിഡൻസി കാര്യങ്ങളുടെ ജനറൽ ഡയറക്ടർ ജനറലിൻ്റെ അംഗീകാരത്തോടെയാണ് ഈ നടപടിക്രമങ്ങൾ നടപ്പിലാക്കുക. വിസ മാറ്റം അനുവദനീയമായ അഞ്ച് പ്രധാന സാഹചര്യങ്ങൾ താഴെ പറയുന്നവയാണ്:

 * സർക്കാർ വിസിറ്റ് വിസക്കാർ: ഏതെങ്കിലും മന്ത്രാലയം, പൊതു അതോറിറ്റി, അല്ലെങ്കിൽ സ്ഥാപനം എന്നിവയിൽ സർക്കാർ വിസിറ്റ് വിസയിൽ പ്രവേശിച്ചവർക്ക് റെസിഡൻസിക്കായി അപേക്ഷിക്കാം. ഇവർക്ക് ഒരു യൂണിവേഴ്സിറ്റി ബിരുദമോ അല്ലെങ്കിൽ പ്രത്യേക സാങ്കേതിക യോഗ്യതയോ ഉണ്ടായിരിക്കണം.

 * ഗാർഹിക തൊഴിലാളികളും സമാന തസ്തികകളും: ഗാർഹിക തൊഴിലാളികൾക്കും (ഡൊമസ്റ്റിക് വർക്കേഴ്സ്) സമാന തസ്തികകളിലുള്ളവർക്കും നിലവിലെ നിയമങ്ങൾക്കും ചട്ടങ്ങൾക്കും അനുസൃതമായി വിസിറ്റ് വിസ റെസിഡൻസിയായി മാറ്റാം.

 * കുടുംബ വിസിറ്റ് വിസക്കാർ: കുവൈത്തിൽ നിയമപരമായി താമസിക്കുന്ന അടുത്ത കുടുംബാംഗത്തോടൊപ്പം ചേരുന്നതിന് വേണ്ടി എത്തിയവർക്ക് (കുടുംബ വിസിറ്റ് വിസയിലോ ടൂറിസ്റ്റ് വിസയിലോ വന്നവർക്ക്) വിസ മാറ്റം സാധ്യമാകും.
 
* വർക്ക് വിസയിൽ വന്നവർ: വർക്ക് വിസയിൽ രാജ്യത്ത് പ്രവേശിക്കുകയും റെസിഡൻസി നടപടികൾ ആരംഭിക്കുകയും ചെയ്ത ശേഷം അടിയന്തര കാരണങ്ങളാൽ ഒരു മാസത്തിൽ കൂടാത്ത കാലയളവിൽ രാജ്യം വിട്ടുപോകാൻ നിർബന്ധിതരായ വ്യക്തികൾക്ക്, തിരികെ വരുമ്പോൾ വിസിറ്റ് വിസ റെസിഡൻസിയാക്കി മാറ്റാം.

 * മറ്റ് പ്രത്യേക സാഹചര്യങ്ങൾ: മേൽപ്പറഞ്ഞവ കൂടാതെ, ഓരോ കേസിൻ്റെയും മെറിറ്റ് അനുസരിച്ച്, വിസ മാറ്റത്തിനായി വരുന്ന മറ്റ് പ്രത്യേക സാഹചര്യങ്ങൾക്കും റെസിഡൻസി കാര്യങ്ങളുടെ ജനറൽ ഡയറക്ടർ ജനറലിന് സ്വന്തം വിവേചനാധികാരം ഉപയോഗിച്ച് അംഗീകാരം നൽകാവുന്നതാണ്.