കുവൈത്തിലെ ദേശീയ ദിന, വിമോചന ദിനാഘോഷങ്ങൾക്ക് തുടക്കമായി; ബയാൻ പാലസിൽ പതാക ഉയർത്തി

കുവൈറ്റ്:  കുവൈത്തിന്റെ 64-ാം ദേശീയ ദിനത്തെയും 34-ാം വിമോചന ദിനാഘോഷങ്ങൾ ബയാൻ പാലസിൽ നടന്ന ഔദ്യോഗിക പതാക ഉയർത്തൽ ചടങ്ങോടെ ആരംഭിച്ചു. കുവൈത്തിന്റെ അമീർ ശൈഖ് മിഷ്അൽ അൽ അഹമ്മദ് അൽ ജാബിർ അൽ സബാഹ് ചടങ്ങിന് നേതൃത്വം നൽകി.

ദേശീയ ആഘോഷങ്ങളുടെ ഔദ്യോഗിക തുടക്കമായി കുവൈത്തിലെ ആറ് ഗവർണറേറ്റുകളിലും പതാക ഉയർത്തൽ ചടങ്ങുകൾ നടന്നു. തെരുവുകളിലും ഗവൺമെന്റ് കെട്ടിടങ്ങളിലുമെങ്ങും അമീറും കിരീടാവകാശിയും ഉൾപ്പെടെയുള്ള നേതാക്കളുടെയും കുവൈത്ത് പതാകയുടെയും ചിത്രങ്ങളോടെ രാജ്യത്ത് ഉത്സവാന്തരീക്ഷം നിറഞ്ഞു.

രാജ്യത്തിന്റെ ചരിത്രവും നേട്ടങ്ങളും ദേശീയ തലത്തിൽ മുന്നോട്ടുവച്ച നാഴികക്കല്ലുകളും ആഘോഷങ്ങളിലൂടെ വമ്പിച്ച രീതിയിൽ പ്രദർശിപ്പിക്കും. കുവൈത്ത് 2025-ലെ അറബ് സംസ്‌കാരത്തിന്റെയും മാധ്യമത്തിന്റെയും തലസ്ഥാനമായി തെരഞ്ഞെടുത്തതിന്റെ പശ്ചാത്തലത്തിൽ ഈ വർഷത്തെ ആഘോഷങ്ങൾ പ്രത്യേക പ്രാധാന്യമർഹിക്കുന്നു. 

കുവൈത്തിന്റെ സമ്പന്നമായ സംസ്‌കാരവും കലയും മാധ്യമ രംഗത്തെ മുന്നേറ്റങ്ങളും ആഗോള സമൂഹത്തിന് മുന്നിൽ അവതരിപ്പിക്കാൻ ഈ ആഘോഷങ്ങൾ വലിയ അവസരമാകുന്നു.

അറബ് രാജ്യങ്ങൾക്കിടയിലെ സാംസ്‌കാരിക സൗഹൃദത്തിന്റെയും സംവാദത്തിന്റെയും ഭാവി ഭദ്രമായതാക്കാൻ കുവൈത്ത് നടത്തുന്ന ശ്രമങ്ങൾക്കും ഈ ദേശീയ ആഘോഷങ്ങൾ മാറ്റുരച്ചു നിൽക്കും.