കുവൈറ്റിലെ പ്രഥമ മലയാളി പെന്തക്കോസ്ത് സഭയ്ക്ക് 60 വയസ്; ഡയമണ്ട് ജൂബിലി വർഷാഘോഷങ്ങളുടെ പ്രൗഢഗംഭീരമായ യോഗം കുവൈറ്റ് ആസ്പർ ഓഡിറ്റോറിയത്തിൽ നടന്നു

കുവൈറ്റ് സിറ്റി: കുവൈറ്റിലെ മലയാളി പെന്തക്കോസ്ത് സമൂഹത്തിന്റെ ആത്മീയ ചരിത്രത്തോടൊപ്പം വളർന്ന പ്രഥമ സഭയായ പെന്തക്കോസ്തൽ ചർച്ച് ഓഫ് കുവൈറ്റ് (പി.സി.കെ) അറുപതാം വാർഷികം നടത്തി . ഡയമണ്ട് ജൂബിലി വർഷാഘോഷങ്ങളുടെ പ്രൗഢഗംഭീരമായ യോഗം കുവൈറ്റ് ആസ്പർ ഓഡിറ്റോറിയത്തിൽ നടന്നു.

സഭാ പാസ്റ്റർ എബ്രഹാം വർഗീസിന്റെ അധ്യക്ഷതയിൽ നടന്ന സമ്മേളനത്തിൽ കുവൈറ്റിലെ സാമൂഹിക-ആത്മീയ രംഗത്തെ പ്രമുഖർ പങ്കെടുത്തു. അൽമുല്ല എക്സ്ചേഞ്ച് ജനറൽ മാനേജർ ഫിലിപ്പ് കോശി , നാഷണൽ ഇവാഞ്ചലിക്കൽ ചർച്ച് സെക്രട്ടറി റോയി കെ. യോഹന്നാൻ, കെ.ടി.എം.സി.സി സെക്രട്ടറി അജോഷ് മാത്യു, പാസ്റ്റർ ബെൻസൺ തോമസ്, പാസ്റ്റർ വി.ടി. എബ്രഹാം, സഭാ സെക്രട്ടറി സുനിൽ വർഗ്ഗീസ് എന്നിവർ ആശംസാപ്രസംഗങ്ങൾ നടത്തി.

സഭയുടെ ആറ് പതിറ്റാണ്ടുകാലത്തെ ചരിത്രം ദൃശ്യവൽക്കരിച്ചുകൊണ്ട് ഹാർവെസ്റ്റ് ടെലിവിഷൻ തയ്യാറാക്കിയ ഡോക്യുമെന്ററി പ്രദർശനം ശ്രദ്ധേയമായി. വാർഷികത്തോടനുബന്ധിച്ച് പുറത്തിറക്കുന്ന ‘പ്രയാണം’ എന്ന പ്രത്യേക സ്മരണിക പാസ്റ്റർ എബ്രഹാം വർഗീസ് നഹ്ദത് ഗ്രൂപ്പിലെ എം.ഡി. മാത്യു പണിക്കർക്ക് നൽകി പ്രകാശനം ചെയ്തു.

 ഗായകൻ ഷാരൂൺ വർഗ്ഗീസ് ആലപിച്ച ഗാനങ്ങൾ ചടങ്ങിന് മിഴിവേകി.ജനറൽ കോഡിനേറ്റർ റെജി വലിയ മണ്ണിൽ , പ്രോഗ്രാം കോഡിനേറ്റർ മനോജ് പുന്നൂസ്,ട്രഷറാർ സജി ജോൺ , സെക്രട്ടറി സുനിൽ വർഗ്ഗീസ് എന്നിവർ പ്രവർത്തനങ്ങൾക്ക് നേതൃത്വം നൽകി.
നൂറുകണക്കിന് വിശ്വാസികളും വിവിധ സഭാ പ്രതിനിധികളും പങ്കെടുത്ത ഈ ചടങ്ങ് കുവൈറ്റിലെ പെന്തക്കോസ്ത് ചരിത്രത്തിലെ ഒരു സുപ്രധാന ഏടായി മാറി.