'പലസ്തീൻ ജനതയോട് ഐക്യദാർഢ്യം'; പുതുവർഷ ആഘോഷങ്ങൾക്ക് നിരോധനം ഏർപ്പെടുത്തി ഷാർജ

അബുദബി: പുതുവര്‍ഷ ആഘോഷങ്ങള്‍ക്ക് നിരോധനം ഏര്‍പ്പെടുത്തി ഷാര്‍ജ. ഗാസയില്‍ ദുരിതം അനുഭവിക്കുന്ന പലസ്തീന്‍ ജനതയോട് ഐക്യദാര്‍ഢ്യം പ്രഖ്യാപിച്ചുകൊണ്ടാണ് തീരുമാനം. ഡിസംബര്‍ 31നും ജനുവരി ഒന്നിനും വെടിക്കെട്ടോ മറ്റ് കരിമരുന്ന് പ്രയോഗങ്ങളോ പാടില്ലെന്ന് ഷാര്‍ജ പൊലീസ് അറിയിച്ചിട്ടുണ്ട്. ഒരു തരത്തിലുമുള്ള ആഘോഷ പരിപാടികളും വേണ്ടെന്നാണ് തീരുമാനം.

വ്യക്തികള്‍ക്കും സ്വകാര്യ- പൊതുമേഖലാ സ്ഥാപനങ്ങള്‍ക്കും വന്‍കിട കോര്‍പ്പറേറ്റുകള്‍ക്കും തീരുമാനം ബാധകമാണ്. നിരോധനം ലംഘിച്ച് ആഘോഷം നടത്തുന്നവര്‍ക്കെതിരെ കടുത്ത നടപടി ഉണ്ടാകുമെന്നും ഷാര്‍ജ പൊലീസ് മുന്നറിയിപ്പ് നല്‍കി.

വാരാന്ത്യ അവധി കൂടി ചേര്‍ത്ത് പുതുവര്‍ഷത്തിന് ഷാര്‍ജയില്‍ നാലു ദിവസത്തെ പൊതു അവധി ലഭിക്കും. വെള്ളി, ശനി, ഞായര്‍ ദിവസങ്ങളിലെ വാരാന്ത്യ അവധിക്കൊപ്പം ജനുവരി ഒന്ന് തിങ്കളാഴ്ച, രാജ്യത്ത് പൊതു അവധി പ്രഖ്യാപിച്ചിട്ടുണ്ട്. അതേസമയം, മറ്റ്? എമിറേറ്റുകളില്‍ ഇതുവരെ പുതുവര്‍ഷ ആഘോഷങ്ങള്‍ക്ക് വിലക്ക്? പ്രഖ്യാപിച്ചിട്ടില്ല.