ഓസ്‌ട്രേലിയൻ ആക്രമണം: സൊഹ്റാൻ മംദാനിക്ക് മേൽ വിമർശനം ശക്തം

ന്യൂയോർക്ക്: സിഡ്‌നിയിലെ ബോണ്ടയ് ബീച്ചില്‍ ഹനുക്ക ആഘോഷത്തിനിടെ നടന്ന വെടിവയ്പ്പിനെത്തുടർന്ന്, ന്യൂയോർക്ക് സിറ്റി ഡെമോക്രാറ്റിക് മേയർ സൊഹ്റാൻ മംദാനി വീണ്ടും വിമർശനങ്ങൾക്ക് വിധേയനാകുന്നു. 

സിഡ്‌നിയിലെ വെടിവയ്പ്പിന് മണിക്കൂറുകൾക്ക് ശേഷം മംദാനി അക്രമത്തെ അപലപിച്ച് പ്രസ്താവന പുറത്തിറക്കി. 'സിഡ്‌നിയിലെ ഹനുക്ക ആഘോഷത്തിൽ നടന്ന ആക്രമണം ജൂതവിദ്വേഷപരമായ ഭീകരപ്രവൃത്തിയാണ്,' അദ്ദേഹം പറഞ്ഞു. കൊല്ലപ്പെട്ടവർക്ക് വേണ്ടി അനുശോചനം രേഖപ്പെടുത്തുന്നുവെന്നും അവരുടെ കുടുംബങ്ങളെയും ജൂത സമൂഹത്തെയും പ്രാർഥനയിൽ ഓർക്കുന്നുവെന്നും അദ്ദേഹം കൂട്ടിച്ചേർത്തു.

മുൻപ്, മേയർ തിരഞ്ഞെടുപ്പ് പ്രചാരണ വേളയിൽ, പ്രശസ്തമായ 'ഗ്ലോബലൈസ് ദി ഇൻതിഫാദ' എന്ന മുദ്രാവാക്യത്തെ അപലപിക്കാൻ മംദാനി തയ്യാറായിരുന്നില്ല. "ഞാൻ ഉപയോഗിക്കുന്ന ഭാഷയല്ല അത്," എന്നാണ് അദ്ദേഹം അന്ന് പ്രതികരിച്ചത്. ഒക്ടോബർ 7-ലെ ഹമാസ് ആക്രമണത്തിന് ശേഷമുള്ള പലസ്തീൻ അനുകൂല പ്രകടനങ്ങൾക്ക് ശേഷം ന്യൂയോർക്ക് രാഷ്ട്രീയത്തിൽ ഈ മുദ്രാവാക്യം ഒരു വലിയ ചർച്ചാവിഷയമായിരുന്നു. 

ഓസ്‌ട്രേലിയൻ അധികൃതരുടെ റിപ്പോർട്ട് അനുസരിച്ച്, ഒരു അച്ഛനും മകനുമാണ് 16 പേരുടെ മരണത്തിന് കാരണമായ ഈ ആക്രമണം നടത്തിയത്. ജൂതവിദ്വേഷപരമായ ഭീകരപ്രവർത്തനമായാണ് ഓസ്‌ട്രേലിയൻ പ്രധാനമന്ത്രി ആന്തണി ആൽബനീസ് ഇതിനെ വിശേഷിപ്പിച്ചത്.