ഡാളസിൽ കാറിനുള്ളില്‍ കുഞ്ഞ് ചൂടേറ്റു മരിച്ചു; അമ്മ അറസ്റ്റില്‍

ഡാളസ്: ചൂടുള്ള കാറിനുള്ളില്‍ കുഞ്ഞിനെ ഉപേക്ഷിച്ചതിനെ തുടര്‍ന്ന് കുഞ്ഞ് മരിച്ച സംഭവത്തില്‍ അമ്മയെ പോലീസ് അറസ്റ്റ് ചെയ്തു. ഡാളസില്‍ നിന്നുള്ള 27-കാരിയായ വനേസ എസ്‌ക്വിവല്‍ എന്ന യുവതിയെയാണ് പോലീസ് കൊലക്കുറ്റം ചുമത്തി അറസ്റ്റ് ചെയ്തത്.

ഫ്രിസ്‌കോയിലെ ഒരു സ്പാ സെന്ററില്‍ ജോലി ചെയ്യുമ്പോള്‍ 15 മാസം മാത്രം പ്രായമുള്ള മകനെ കാറിനുള്ളില്‍ ഉപേക്ഷിച്ചെന്നാണ് പോലീസ് പറയുന്നത്. കടുത്ത ചൂടേറ്റതാണ് കുഞ്ഞിന്റെ മരണകാരണമെന്ന് മെഡിക്കല്‍ റിപ്പോര്‍ട്ടില്‍ പറയുന്നു.

ആഗസ്റ്റ് 16-നാണ് സംഭവം നടന്നത്. കുഞ്ഞിന് ബോധം നഷ്ടപ്പെട്ട നിലയില്‍ അമ്മ തന്നെയാണ് പ്ലാനോയിലെ മെഡിക്കല്‍ സിറ്റി ആശുപത്രിയിലെ അത്യാഹിത വിഭാഗത്തില്‍ എത്തിച്ചത്. ആശുപത്രിയില്‍ എത്തുമ്പോള്‍ കുഞ്ഞിന്റെ ശരീരതാപനില 106 ഡിഗ്രിക്ക് മുകളിലായിരുന്നു. ആശുപത്രിയില്‍ എത്തിക്കുന്നതിന് മുന്‍പേ കുഞ്ഞ് മരിച്ചിരുന്നുവെന്നാണ് ഡോക്ടര്‍മാര്‍ അറിയിച്ചത്.

പോലീസ് അന്വേഷണത്തില്‍, വനേസ ആദ്യം പോലീസിനോട് കളവ് പറഞ്ഞെങ്കിലും പിന്നീട് ഒരു സഹപ്രവര്‍ത്തകനോട് കുഞ്ഞിനെ കാറില്‍ ഉപേക്ഷിച്ച കാര്യം സമ്മതിച്ചു. കുഞ്ഞിനെ നോക്കാന്‍ ആളില്ലാത്തതുകൊണ്ടാണ് ഇങ്ങനെ ചെയ്തതെന്നാണ് യുവതിയുടെ മൊഴി. സംഭവം നടന്ന ദിവസം ഫ്രിസ്‌കോയില്‍ 95 ഡിഗ്രി ഫാരന്‍ഹീറ്റ് വരെ ചൂട് രേഖപ്പെടുത്തിയിരുന്നു. ആശുപത്രിയിലേക്ക് പോകുന്നതിന് മുന്‍പ് വനേസ മക്‌ഡൊണാള്‍ഡ്‌സില്‍ കയറി ഭക്ഷണം വാങ്ങിയതായും പോലീസ് പറയുന്നു.

വനേസയെ കൊളിന്‍ കൗണ്ടി ജയിലില്‍ പാര്‍പ്പിച്ചിരിക്കുകയാണ്. 250,000 ഡോളര്‍ ജാമ്യത്തുകയായി നിശ്ചയിച്ചിട്ടുണ്ട്.