ബ്രാപ്മണര്‍ ഇന്ത്യന്‍ ജനതയെ ചൂഷണം ചെയ്യുന്നു: യുഎസ്

ന്യൂയോര്‍ക്ക്: റഷ്യന്‍ എണ്ണ വാങ്ങുന്നതിന്‍റെ പേരില്‍ ഇന്ത്യയ്ക്കെതിരെ പുതിയ വിമര്‍ശനവുമായി വൈറ്റ് ഹൗ് വ്യാപാര ഉപദേഷ്ടാവ് പീറ്റര്‍ നവാരോ. ബ്രാപ്മണര്‍ ഇന്ത്യന്‍ ജനതയുടെ ചെലവില്‍ ലാഭം കൊയ്യുകയാണെന്നും അത് നിര്‍ത്തണമെന്നുമാണ് ഇപ്പോള്‍ നവാരോയുടെ ആവശ്യം.

" നോക്കൂ, നരേന്ദ്ര മോദി ഒരു മികച്ച നേതാവാണ്.ലോകത്തിലെ ഏറ്റവും വലിയ ജനാധിപത്യ രാജ്യമായിരിക്കെ ഇന്ത്യന്‍ നേതാവ് എങ്ങനെയാണ് റഷ്യന്‍ പ്രസിഡന്‍റ് വ്ലാഡിമിര്‍ പുടിനുമായും ചൈനീസ് പ്രസിഡന്‍റ് ഷീ ജിന്‍പിങുമായും സഹകരിക്കുന്നതെന്ന് എനിക്കു മനസിലാകുന്നില്ല. അതു കൊണ്ട് ലളിതമായി പറയാം. എന്താണ് സംഭവിക്കുന്നതെന്ന് ഇന്ത്യന്‍ ജനത ദയവായി മനസിലാക്കുക. ബ്രാപ്മണര്‍ ഇന്ത്യന്‍ ജനതയെ ചൂഷണം ചെയ്ത് ലാഭം കൊയ്യുന്നു. നമ്മള്‍ അത് നിര്‍ത്തേണ്ടതുണ്ട്'~ ഫോക്സ് ന്യൂസിനു നല്‍കിയ അഭിമുഖത്തില്‍ പീറ്റര്‍ നവാരോ പറഞ്ഞു.

വ്യാപാര, താരിഫ് വിഷയങ്ങളില്‍ പ്രസിഡന്‍റ് ഡോണള്‍ഡ് ട്രംപിന്‍റെ നയങ്ങളെ ചൊല്ലി യുഎസും ഇന്ത്യയും തമ്മിലുള്ള ബന്ധത്തില്‍ വലിയ വിള്ളല്‍ വീണതിനെ തുടര്‍ന്ന് തുടര്‍ച്ചയായി ഇന്ത്യയ്ക്കെതിരെ വിവാദ പ്രസ്താവനകളുമായി രംഗത്തെത്തിയിരിക്കുകയാണ് വൈറ്റ് ഹൗസ് വ്യാപാര ഉപദേഷ്ടാവും ട്രേഡ് ആന്‍ഡ് മാനുഫാക്ച്വറിങ് സീനിയര്‍ കൗണ്‍സിലറുമായ പീറ്റര്‍ നവാരോ.