യുഎസ് വിസക്ക് അപേക്ഷിക്കാൻ 40,000 രൂപയാകും

ജൂലൈ 4 ന് ഒപ്പുവച്ച 'ബിഗ് ബ്യൂട്ടിഫുൾ ബിൽ' പ്രകാരം, യുഎസ് പ്രസിഡന്റ് ഡൊണാൾഡ് ട്രംപ് മിക്ക നോൺ-ഇമിഗ്രന്റ് വിസ വിഭാഗങ്ങൾക്കും 250 ഡോളറിന്റെ പുതിയ 'വിസ ഇന്റഗ്രിറ്റി ഫീസ്' ഏർപ്പെടുത്തി. ടൂറിസം, പഠനം, ജോലി എന്നിങ്ങനെ യുഎസ് സന്ദർശിക്കാൻ പദ്ധതിയിടുന്ന ഇന്ത്യൻ അപേക്ഷകർക്ക് 2026 മുതൽ വിസയ്ക്കുവേണ്ടി ഉയർന്ന ചെലവ് നേരിടേണ്ടിവരും.ഇപ്പോൾ 16,000 രൂപയിൽ താഴെ വിലയുള്ള ഒരു സാധാരണ ടൂറിസ്റ്റ് വിസയ്ക്ക് ഇനി 40,000 രൂപയിൽ കൂടുതൽ ചിലവാകും.

നിലവിൽ വിസയ്ക്കുവരുന്ന ചെലവുകൾക്കൊപ്പം $250 (21,400 രൂപ) സർചാർജ് കൂടി ചേർത്താണ് യുഎസ് വിസ ഇന്റഗ്രിറ്റി ഫീസ്.വിസ ഇഷ്യു ചെയ്യുന്ന സമയത്ത് ഇത് നിർബന്ധമായിരിക്കും.2026 മുതൽ പ്രാബല്യത്തിൽ വരും.

ബി-1/ബി-2 (ടൂറിസ്റ്റ്, ബിസിനസ് വിസകൾ), എഫ്, എം (സ്റ്റുഡന്റ് വിസകൾ), എച്ച്-1ബി (വർക്ക് വിസകൾ), ജെ (എക്‌സ്‌ചേഞ്ച് വിസിറ്റർ വിസകൾ) എന്നിവയുൾപ്പെടെ മിക്ക നോൺ-ഇമിഗ്രന്റ് വിസകൾക്കും ഫീസ് ബാധകമാണ്. എ, ജി വിഭാഗങ്ങളിലെ നയതന്ത്ര വിസ ഉടമകൾക്ക് മാത്രമേ ഇളവ് ലഭിക്കൂ. ഇന്ത്യൻ വിദ്യാർത്ഥികൾ, ടെക് പ്രൊഫഷണലുകൾ, വിനോദസഞ്ചാരികൾ, യുഎസിലേക്കുള്ള ബിസിനസ്സ് യാത്രക്കാർ എന്നിവരെയെല്ലാം അധിക നിരക്ക് ബാധിക്കുമെന്നാണ് ഇതിനർത്ഥം.

നിലവിൽ, യുഎസ് ബി-1/ബി-2 വിസയ്ക്ക് 185 ഡോളർ ആണ്. അതായത് 15,800 രൂപയിൽ കൂടുതൽ.

വിസ ഇന്റഗ്രിറ്റി ഫീസ്, I-94 ഫീസ് ($24), എസ്റ്റാ (ഇഎസ്ടിഎ) ഫീസ് ($13) തുടങ്ങിയ മറ്റ് ചെറിയ ഫീസുകൾ കൂടി ചേർക്കുന്നതോടെ, മൊത്തം ചെലവ് ഏകദേശം $472 ആയി ഉയരും, അതായത് 40,502 രൂപ. ഇത് നിലവിലെ വിസ ചെലവിന്റെ 2.5 മടങ്ങ് കൂടുതലാണ്. എഫ്, എച്ച്-1ബി പോലുള്ള വിസകൾക്ക് അപേക്ഷിക്കുന്ന വിദ്യാർത്ഥികൾക്കോ ജീവനക്കാർക്കോ ഉള്ള ചെലവുകളും കുത്തനെ ഉയരും.

ഫീസ് ഒഴിവാക്കാനോ കുറയ്ക്കാനോ കഴിയില്ലെങ്കിലും, ചില വ്യവസ്ഥകൾക്ക് വിധേയമായി അത് റീഫണ്ട് ചെയ്യാവുന്നതാണ്. വിസ കാലാവധി കഴിഞ്ഞതിന് ശേഷം അഞ്ച് ദിവസത്തിനുള്ളിൽ യുഎസിൽ നിന്ന് പുറത്തുപോകുകയോ നിയമപരമായി താമസം നീട്ടുക, സ്റ്റാറ്റസ് മാറുകയോ (ഉദാഹരണത്തിന് - ഗ്രീൻ കാർഡ് നേടുക) തുടങ്ങിയ എല്ലാ വിസ നിബന്ധനകളും വിസ ഉടമ പാലിക്കുകയാണെങ്കിൽ, അവർക്ക് റീഫണ്ടിന് അർഹതയുണ്ടായിരിക്കാം. ഒരു വ്യക്തി വിസ നിയമങ്ങൾ ലംഘിക്കുകയോ കാലാവധി കഴിഞ്ഞിട്ടും രാജ്യത്ത് തങ്ങുകയോ ചെയ്താൽ, റീഫണ്ട് ലഭിക്കില്ല.

സുരക്ഷാ നടപടിയായാണ് യുഎസ് സർക്കാർ ഈ ഫീസ് ഏർപ്പെടുത്തിയിരിക്കുന്നത്. സന്ദർശകരെ അവരുടെ വിസയുടെ നിയമങ്ങൾ പാലിക്കാൻ രൂപകൽപ്പന ചെയ്തിരിക്കുന്ന ഒന്നാണിത്.