അമേരിക്കൻ സ്വപ്നം മരിക്കുന്നു; ഡെമോക്രാറ്റുകൾക്കും പങ്കുണ്ടെന്ന് കമല ഹാരിസ്

സാൻ ഫ്രാൻസിസ്കോ: അമേരിക്കൻ സ്വപ്നം തകർന്നുകൊണ്ടിരിക്കുകയാണെന്നും അതിന് ഡെമോക്രാറ്റിക് പാർട്ടിക്കും ഉത്തരവാദിത്തമുണ്ടെന്നും മുൻ വൈസ് പ്രസിഡന്റ് കമല ഹാരിസ്. അടുത്തിടെ ഡെമോക്രാറ്റിക് നാഷനൽ കമ്മിറ്റി (ഡിഎൻസി) യോഗത്തിൽ നടത്തിയ പ്രസംഗത്തിലാണ് പാർട്ടിക്കാർക്ക് അവർ ശക്തമായ താക്കീത് നൽകിയത്.

തങ്ങളുടെ വിശ്വാസം നിലനിർത്തുന്നതിൽ ഇരു പാർട്ടികളും പരാജയപ്പെട്ടു. ജനങ്ങളുടെ ആവശ്യങ്ങൾ നിറവേറ്റാൻ സർക്കാരിന് കഴിയുന്നില്ലെന്ന് അവർ വിശ്വസിക്കുന്നു. പരാജയപ്പെട്ട പഴയ വ്യവസ്ഥിതിയിലേക്ക് മടങ്ങാൻ ശ്രമിക്കരുത്. പൗരത്വപരമായ നവീകരണം ആവശ്യമാണ്, അതാണ് രാജ്യത്തിന്റെ ഗതി തിരുത്താനുള്ള വഴി എന്നും ഹാരിസ് ആഹ്വാനം ചെയ്തു.

ആർട്ടിഫിഷ്യൽ ഇന്റലിജൻസ് കാരണം തൊഴിലവസരങ്ങൾ നഷ്ടപ്പെടുന്നതും സമൂഹ മാധ്യമങ്ങളിലെ ഭിന്നിപ്പുകളും ഒരുപിടി ആളുകളുടെ കൈകളിലെ അമിതമായ അധികാര കേന്ദ്രീകരണവും അമേരിക്കൻ സ്വപ്നം ഇല്ലാതാക്കുന്നതിൽ പങ്കുവഹിക്കുന്നതായി അവർ ചൂണ്ടിക്കാട്ടി.