ഡെൻവറിൽ നിന്നു പറന്നുയർന്ന വിമാനം ഗിയർ തകരാർ മൂലം അടിയന്തരമായി തിരിച്ചിറക്കി

ഡെൻവർ ഇന്റർനാഷനൽ എയർപോർട്ടിൽ നിന്നു ശനിയാഴ്ച്ച മയാമിയിലേക്കു ടേക്ക്ഓഫ് ചെയ്ത അമേരിക്കൻ എയർലൈൻസ് വിമാനം ലാൻഡിംഗ് ഗിയറിന്റെ തകരാർ മൂലം അടിയന്തരമായി തിരിച്ചിറക്കി. വിമാനത്തിൽ നിന്നു തീയും പുകയും ഉയർന്നുവെന്നാണ് റിപ്പോർട്ട്.

ഒരാൾക്കെങ്കിലും പരുക്കേറ്റു. ഉച്ചയ്ക്ക് 2:45നാണു ഫ്ലൈറ്റ് 3023 പറന്നുയർന്നത്. റൺവേയിൽ തീയും പുകയും വ്യാപിക്കുന്നതിനിടയിൽ തിരിച്ചിറക്കിയ വിമാനത്തിൽ നിന്നു 173 യാത്രക്കാരെയും 6 ക്രൂ അംഗങ്ങളെയും എമർജൻസി എക്സിറ്റ് വഴി ഇറക്കി.

ബോയിങ് 737 വിമാനത്തിനു ഗിയർ തകരാർ ആണ് സംഭവിച്ചതെന്നു എഫ് എ എ വൃത്തങ്ങൾ പറഞ്ഞു. ടയറിനു പ്രശ്നം ഉണ്ടായിരുന്നുവെന്നു എയർലൈൻ പറഞ്ഞതായി ഡെൻവർ 7 റിപ്പോർട്ട് ചെയ്തു.

യാത്രക്കാരെ മറ്റൊരു വിമാനത്തിൽ മയാമിയിലേക്കു അയക്കുമെന്ന് അമേരിക്കൻ എയർലൈൻസ് അറിയിച്ചു.