കൈക്കൂലി കേസ്; മുൻ ജെഴ്സി സിറ്റി വിദ്യാഭ്യാസ ബോർഡ് പ്രസിഡന്റ് സുധൻ തോമസ് കുറ്റം സമ്മതിച്ചു

കൈക്കൂലി കേസിൽ മുൻ ജെഴ്സി സിറ്റി വിദ്യാഭ്യാസ ബോർഡ് പ്രസിഡന്റ് സുധൻ തോമസ് കുറ്റം സമ്മതിച്ചു. 2019-ലെ സ്കൂൾ ബോർഡ്, സിറ്റി കൗൺസിൽ തിരഞ്ഞെടുപ്പ് പ്രചാരണ വേളയിൽ ഒരു ടാക്സ് അറ്റോർണി സ്ഥാപനത്തിൽ നിന്ന് 35,000 ഡോളർ കൈക്കൂലി വാങ്ങിയെന്ന് അദ്ദേഹം സമ്മതിച്ചതായി ന്യൂജേഴ്സി അറ്റോർണി ജനറൽ മാത്യു പ്ലാറ്റ്കിന്റെ ഓഫീസ് അറിയി ഇതിനുപകരമായി, നഗര കരാറുകൾ ആ സ്ഥാപനത്തിന് നൽകുമെന്ന് സുധൻ തോമസ് ഉറപ്പുനൽകിയിരുന്നു.

കുറ്റം സമ്മതിച്ചതിലൂടെ, പ്രോസിക്യൂട്ടർമാർ അഞ്ചുവർഷത്തെ തടവുശിക്ഷ ശുപാർശ ചെയ്യും. ഒക്ടോബർ 17-നാണ് അദ്ദേഹത്തിന്റെ കേസിൽ വിധി വരിക. 10,000 ഡോളർ പിഴയടയ്ക്കാനും, 30,000 ഡോളർ നഷ്ടപരിഹാരം നൽകാനും, പൊതുരംഗത്ത് നിന്ന് എന്നെന്നേക്കുമായി വിട്ടുനിൽക്കാനും അദ്ദേഹം സമ്മതിച്ചു.

2023-ൽ ജെഴ്സി സിറ്റി എംപ്ലോയ്മെന്റ് ആൻഡ് ട്രെയിനിങ് പ്രോഗ്രാമുമായി ബന്ധപ്പെട്ട തട്ടിപ്പ് കേസിൽ സുധൻ തോമസ് നേരത്തെ കുറ്റം സമ്മതിച്ചിരുന്നു. ഈ കൈക്കൂലി കേസിൽ ഉൾപ്പെട്ട മറ്റ് നിരവധി ന്യൂജേഴ്സി രാഷ്ട്രീയക്കാർക്കെതിരെ കുറ്റം ചുമത്തിയിട്ടുണ്ട്.