ന്യൂയോര്‍ക്ക്: ഹിന്ദു വിശ്വാസമാണ് യുഎസ് പ്രസിഡന്റ് തെരഞ്ഞെടുപ്പില്‍ റിപ്പബ്ളിക്കന്‍ പാര്‍ട്ടിയുടെ സ്ഥാനാര്‍ഥിത്വത്തിനായി മത്സരിക്കാന്‍ തനിക്കു പ്രേരണയെന്ന് ഇന്ത്യന്‍ വംശജന്‍ വിവേക് രാമസ്വാമി. അടുത്ത തലമുറയ്ക്കു മൂല്യങ്ങള്‍ പകരുന്നതും തന്‍റെ ലക്ഷ്യമാണെന്നും പാലക്കാട്ടു നിന്ന് യുഎസിലേക്കു കുടിയേറിയ കുടുംബാംഗമായ വിവേക് രാമസ്വാമി പറഞ്ഞു. വാഷിങ്ടണ്‍ ഡിസിയില്‍ ഫാമിലി ലീഡര്‍ ഫോറം എന്ന പരിപാടിയില്‍ സംസാരിക്കുകയായിരുന്നു അദ്ദേഹം.
അടുത്ത വര്‍ഷം നടക്കുന്ന യുഎസ് പ്രസിഡന്റ് തെരഞ്ഞെടുപ്പില്‍ നിക്കി ഹാലി, റോണ്‍ ഡി സാന്‍റിസ് എന്നിവര്‍ക്കൊപ്പം റിപ്പബ്ളിക്കന്‍ പാര്‍ട്ടിയുടെ സ്ഥാനാര്‍ഥിത്വത്തിനായുള്ള മത്സരത്തിലാണു വിവേക് രാമസ്വാമി.
""എന്‍റെ വിശ്വാസം എനിക്കു സ്വാതന്ത്ര്യം നല്‍കുന്നുണ്ട്. അതുതന്നെയാണ് എന്നെ ഈ മത്സരത്തില്‍ നയിക്കുന്നത്. ഞാനൊരു ഹിന്ദുവാണ്. ഈശ്വരന്‍ ഒന്നേയുള്ളൂ എന്നാണു ഞാന്‍ വിശ്വസിക്കുന്നത്. ദൈവം നമുക്ക് ഓരോ നിയോഗങ്ങള്‍ നല്‍കിയിട്ടുണ്ട്. ആ നിയോഗം കണ്ടെത്തേണ്ടതും സാക്ഷാത്കരിക്കേണ്ടതും നമ്മള്‍ ഓരോരുത്തരുടെയും ധാര്‍മികമായ ചുമതലയാണ്. ദൈവം പലരീതിയില്‍ നമ്മളിലൂടെ പ്രവര്‍ത്തിക്കുന്നു. എല്ലാവരിലും ദൈവമുണ്ട് എന്നതുകൊണ്ടുതന്നെ നമ്മളെല്ലാവരും തുല്യരാണ്'''~ വിവേക് രാമസ്വാമി പറഞ്ഞു.
എന്‍റെ മാതാപിതാക്കള്‍ എന്നെ പഠിപ്പിച്ചത് കുടുംബമാണ് അടിത്തറയെന്നാണ്. വിവാഹം പവിത്രമാണ്. വിവാഹത്തിനുമുന്‍പു സ്വയം നിയന്ത്രണം വേണം. വിവാഹേതര ബന്ധം പാടില്ല. വിവാഹം സ്ത്രീയും പുരുഷനും തമ്മിലാണ്. വിവാഹമോചനം നിങ്ങള്‍ തെരഞ്ഞെടുക്കുന്ന വെറുമൊരു മുന്‍ഗണനയല്ല. ദൈവത്തിനു മുന്നിലാണ് നിങ്ങള്‍ വിവാഹിതരാകുന്നത്. ദൈവത്തിനു മുന്നില്‍ നിങ്ങളും കുടുംബവും ഇതുസംബന്ധിച്ച് പ്രതിജ്ഞയെടുക്കുന്നുമുണ്ട്.
ഞാന്‍ പഠിച്ചത് ഒരു ക്രിസ്ത്യന്‍ സ്കൂളിലാണ്. അവിടെ ഞാന്‍ ബൈബിള്‍ വായിച്ചു. പഠിച്ചു. അതില്‍ പറയുന്നതും ഒന്നുതന്നെ മാതാപിതാക്കളെ ബഹുമാനിക്കുക. കള്ളം പറയരുത്, മോഷ്ടിക്കരുത്. ഈ മൂല്യങ്ങളും ആശയങ്ങളും ഹിന്ദുക്കളുടേതും ക്രിസ്ത്യാനികളുടേതും മാത്രമല്ല എല്ലാവരുടേതുമാണ്. രാജ്യത്താകെ ൈ്രകസ്തവികത പ്രോത്സാഹിപ്പിക്കുന്ന പ്രസിഡന്‍റാകാന്‍ എനിക്ക് കഴിയില്ല. പ്രസിഡന്റ് അങ്ങനെ ചെയ്യണമെന്ന് നിങ്ങള്‍ ആഗ്രഹിക്കുന്നുമില്ല. എന്നാല്‍, ആ മൂല്യങ്ങള്‍ പ്രോത്സാഹിപ്പിക്കാനും അടുത്ത തലമുറയ്ക്കായി പങ്കുവയ്ക്കാനും മാതൃക കാണിക്കാനും എനിക്കു കഴിയും. ഒരു പ്രസിഡന്റ് എന്ന നിലയില്‍ യുഎസില്‍ കുടുംബം, കഠിനാധ്വാനം, ദേശസ്നേഹം, വിശ്വാസം എന്നിവ ഊട്ടി ഉറപ്പിക്കുവാന്‍ എനിക്ക് സാധിച്ചുവെന്ന് വരാമെന്നും അദ്ദേഹം.
സ്ഥാനാര്‍ഥിത്വത്തില്‍ തന്‍റെ എതിരാളികളായ നിക്കി ഹാലിക്കും ഡിസാന്‍റിസിനുമൊപ്പമാണ് രാമസ്വാമി പരിപാടിയില്‍ പങ്കെടുത്തത്. മുന്‍ പ്രസിഡന്റ് ഡോണള്‍ഡ് ട്രംപിനെയും ക്ഷണിച്ചിരുന്നെങ്കിലും അദ്ദേഹം പരിപാടിയില്‍ പങ്കെടുത്തില്ല.
/sathyam/media/agency_attachments/5VspLzgrB7PML1PH6Ix6.png)
Follow Us/sathyam/media/media_files/r579VJQAjDJejxEfUpvm.jpg)