120 ജീവനക്കാരെ കൂട്ടത്തോടെ പിരിച്ചുവിടാനൊരുങ്ങി ഹൂസ്റ്റൺ കാത്തലിക് ചാരിറ്റീസ്

ഹൂസ്റ്റൺ : അഭയാർഥി പുനരധിവാസ പരിപാടി താൽക്കാലികമായി നിർത്തിവച്ചിരിക്കെ ഹൂസ്റ്റണിലെ കാത്തലിക് ചാരിറ്റീസ് 120 ജീവനക്കാരെ പിരിച്ചുവിടും. ജനുവരി പകുതിയോടെ പ്രസിഡന്റ് ഡോണാൾഡ് ട്രംപ് യുഎസ് അഭയാർഥി പ്രവേശന പരിപാടി (യുഎസ്ആർഎപി) താൽക്കാലികമായി നിർത്തിവയ്ക്കുകയും പതിറ്റാണ്ടുകളായി അഭയാർഥികളെ സഹായിച്ച സംഘടനകൾക്കുള്ള ഫെഡറൽ ധനസഹായം നിർത്തുകയും ചെയ്യുന്ന എക്സിക്യൂട്ടീവ് ഉത്തരവിൽ ഒപ്പുവച്ചിരുന്നു.

'ഫെഡറൽ ഫണ്ടിങ് അടുത്തിടെ മരവിപ്പിച്ചതിനാൽ, ഗാൽവെസ്റ്റൺ-ഹൂസ്റ്റൺ അതിരൂപതയുടെ കാത്തലിക് ചാരിറ്റീസ് സ്റ്റാഫിങ് ക്രമീകരണങ്ങൾ വരുത്തിയതിന്റെ ഭാഗമാണ് ഈ പിരിച്ചുവിടലെന്ന് അഭയാർഥികളെ സഹായിക്കുന്ന ലാഭേച്ഛയില്ലാത്ത സംഘടനകളുമായി പ്രവർത്തിക്കുന്ന ഹൂസ്റ്റൺ ഏരിയ ഇമിഗ്രേഷൻ അഭിഭാഷകയായ റൂബി പവേഴ്‌സ് പറഞ്ഞു, ഇത്തരം സംഘടനകൾ സാധാരണയായി അഭയാർഥികൾക്ക് ഇംഗ്ലിഷ് പഠിക്കാനും ജോലി കണ്ടെത്താനും അവരുടെ കുട്ടികളെ സ്കൂളുകളിൽ സജ്ജമാക്കാനും സഹായിക്കുന്നുണ്ട്.

യുഎസ് സിറ്റിസൺഷിപ്പ് ആൻഡ് ഇമിഗ്രേഷൻ സർവീസസിന്റെ നിർവചന പ്രകാരം യുഎസിന് പുറത്തുനിന്നുള്ള, വംശം, മതം, ദേശീയത, രാഷ്ട്രീയ അഭിപ്രായം അല്ലെങ്കിൽ ഒരു പ്രത്യേക സാമൂഹിക ഗ്രൂപ്പിലെ അംഗത്വം എന്നിവ കാരണം തങ്ങൾ പീഡിപ്പിക്കപ്പെട്ടുവെന്ന് തെളിയിക്കുന്ന അല്ലെങ്കിൽ പീഡനത്തെ ഭയപ്പെടുന്ന വ്യക്തികളെയാണ് അഭയർഥികളായി കണക്കാക്കുന്നത്. കാത്തലിക് ചാരിറ്റീസ് പോലുള്ള സംഘടനകളിൽ പ്രവർത്തിക്കുന്നവർക്ക് യുണൈറ്റഡ് സ്റ്റേറ്റ്സിൽ താമസിക്കാൻ അനുവാദമുണ്ടെന്ന് പവേഴ്സ് പറഞ്ഞു.

ഹൂസ്റ്റൺ, ഡാലസ് പോലുള്ള സ്ഥലങ്ങൾ വൈവിധ്യമാർന്ന കമ്മ്യൂണിറ്റികൾ കാരണം അഭയാർഥികളെ പലപ്പോഴും കൈകാര്യം ചെയ്യാൻ കഴിയുന്ന നഗരങ്ങളുടെ ഉദാഹരണങ്ങളാണെന്ന് പവേഴ്സ് പറഞ്ഞു. ഗ്രേറ്റർ ഹൂസ്റ്റൺ കമ്മ്യൂണിറ്റി ഫൗണ്ടേഷന്റെ നേതൃത്വത്തിലുള്ള സഹകരണ സംരംഭമായ അണ്ടർസ്റ്റാൻഡിങ് ഹൂസ്റ്റൺ പ്രകാരം പ്രദേശത്തെ മൂന്ന് വലിയ കൗണ്ടികളിൽ മൊത്തത്തിൽ യുഎസിനെ അപേക്ഷിച്ച് കൂടുതൽ വിദേശികളാണ് ഉള്ളത്.