ഹൂസ്റ്റണിലെ അനധികൃത ഗെയിം റൂമുകളിൽ പരിശോധന; റിങ് ലീഡർ ഉൾപ്പെടെ 45 പേർ അറസ്റ്റിൽ

ഹൂസ്റ്റൺ : ഹൂസ്റ്റൺ പ്രദേശത്തെ അനധികൃത ഗെയിം റൂമുകളിൽ നടത്തിയ പരിശോധനയിൽ കോടിക്കണക്കിന് ഡോളർ തട്ടിപ്പ് നടത്തിയതിന് അറസ്റ്റിലായ 45 പേരിൽ റിച്ച്മണ്ടിൽ നിന്നുള്ള 61 വയസ്സുള്ള റിങ് ലീഡറും പാകിസ്ഥാൻ പൗരനുമായ നിസാർ അലിയും ഉൾപ്പെടുന്നു. ഫെഡറൽ ഉദ്യോഗസ്ഥർ പറയുന്നതനുസരിച്ച്, ബുധനാഴ്ച നടന്ന പൊലീസ് റെയ്ഡുകളിൽ നിസാർ അലിയുടെ 30 ഗെയിം റൂമുകൾ ഉൾപ്പെട്ടിരുന്നു.

ഹൂസ്റ്റണിലുടനീളം ബുധനാഴ്ച അനധികൃത ഗെയിമിങ് റൂമുകളിൽ വ്യാപകമായ റെയ്ഡ് നടന്നു. റെയ്ഡുകളിൽ നിരവധി ഏജൻസികൾ ഉൾപ്പെട്ടു, നിരവധി ആളുകളെ അറസ്റ്റ് ചെയ്തു, ഉദ്യോഗസ്ഥർ മെഷീനുകൾ കണ്ടുകെട്ടി.

ബുധനാഴ്ചത്തെ റെയ്ഡുകളിൽ 720-ലധികം നിയമ നിർവഹണ ഏജന്റുമാരും ഉദ്യോഗസ്ഥരും ഉൾപ്പെട്ടിട്ടുണ്ടെന്ന് യുഎസ് അറ്റോർണി നിക്കോളാസ് ഗഞ്ചെയ് പറയുന്നു. ഹൂസ്റ്റൺ പൊലീസ്, ഹാരിസ് കൗണ്ടി ഷെരീഫ് ഓഫിസ്, ഹോംലാൻഡ് സെക്യൂരിറ്റി ഇൻവെസ്റ്റിഗേഷൻസ് (എച്ച്എസ്ഐ), ഐആർഎസ്, എഫ്ബിഐ എന്നിവയുൾപ്പെടെ ഏകദേശം 20 പ്രാദേശിക, ഫെഡറൽ ഏജൻസികൾ ഈ ഓപ്പറേഷനിൽ ഉൾപ്പെട്ടിരുന്നു.

ഒന്നിലധികം ഏജൻസികൾ ഉൾപ്പെട്ട അഞ്ച് വർഷത്തെ "ഓപ്പറേഷൻ ഡബിൾ ഡൗൺ" ഓപ്പറേഷന്റെ ഫലമായാണ് റെയ്ഡുകൾ നടന്നതെന്ന് ഗഞ്ചെയ് പറയുന്നു. 

പ്രതികൾക്കെതിരെ "ഗൂഢാലോചന, പ്രവർത്തനം" എന്നീ കുറ്റങ്ങൾ ചുമത്തിയിട്ടുണ്ട്. "നിയമവിരുദ്ധമായ ചൂതാട്ട ബിസിനസ്, റാക്കറ്റിങ് എന്നീ കുറ്റങ്ങൾക്ക് അഞ്ച് വർഷം വരെ തടവ് ശിക്ഷ ലഭിക്കും. പ്രതികൾക്കെതിരെ കള്ളപ്പണം വെളുപ്പിക്കൽ ഗൂഢാലോചന കുറ്റവും ചുമത്തിയിട്ടുണ്ട്, ഇതിന് 20 വർഷം വരെ തടവ് ശിക്ഷ ലഭിക്കും.

അറസ്റ്റുകൾക്ക് പുറമേ, 2,000-ത്തിലധികം അനധികൃത സ്ലോട്ട് മെഷീനുകൾ, എട്ട് തോക്കുകൾ, "നിരവധി ഉയർന്ന നിലവാരമുള്ള വാഹനങ്ങൾ", 100 റോളക്സ് വാച്ചുകൾ, 4.5 മില്യൻ ഡോളർ പണം, അക്കൗണ്ടുകളിൽ നിന്നും മറ്റ് ധനകാര്യ സ്ഥാപനങ്ങളിൽ നിന്നും 6.5 മില്യൻ ഡോളർ എന്നിവ ഉദ്യോഗസ്ഥർ പിടിച്ചെടുത്തു.