മകളെ കൊലപ്പെടുത്തിയെന്ന കുറ്റം ചുമത്തി ഇന്ത്യൻ അമേരിക്കൻ ഡോക്ടറെ അറസ്റ്റ് ചെയ്തു

സൗത്ത് ഫ്ലോറിഡയിൽ നാലു വയസുള്ള മകളെ കൊലപ്പെടുത്തിയെന്ന കുറ്റം ചുമത്തി ഇന്ത്യൻ അമേരിക്കൻ ഡോക്ടർ നേഹ ഗുപ്തയെ അറസ്റ്റ് ചെയ്തു. ഒക്‌ലഹോമ സിറ്റിയിൽ ശിശുരോഗ ചികിത്സ നടത്തുന്ന 36കാരിയുടെ പുത്രി ആര്യ തലത്തി കൊല്ലപ്പെട്ടത് ജൂൺ 27നായിരുന്നു.

മയാമിക്കു സമീപം എൽ പോർട്ടൽ ഗ്രാമത്തിൽ ഒഴിവുദിനം ചെലവഴിക്കുമ്പോഴാണ് അതുണ്ടായത്. മുങ്ങി മരിച്ച അപകടം എന്നാണ് ഡോക്ടർ നേഹ ഗുപ്ത റിപ്പോർട്ട് ചെയ്തതെന്നു പോലീസ് പറയുന്നു. ജൂൺ 27 പുലർച്ചെ 3:30നാണു ഡോക്ടർ പോലീസിനെ വിളിച്ചത്.

സ്വിമ്മിങ് പൂളിൽ ബോധമറ്റു കിടന്നിരുന്നു എന്ന് ഡോക്ടർ പറഞ്ഞു. കുട്ടിയെ പോലീസ് ജാക്‌സൺ മെമ്മോറിയൽ ഹോസ്പിറ്റലിൽ എത്തിച്ചെങ്കിലും ജീവൻ രക്ഷിക്കാൻ കഴിഞ്ഞില്ല.

ഓട്ടോപ്‌സിയിൽ കുട്ടി മുങ്ങി മരിച്ചതല്ലെന്നു കണ്ടെത്തിയതോടെയാണ് കേസ് വഴി തിരിഞ്ഞത്. ഗുപ്ത പറഞ്ഞ കാര്യങ്ങളിലെ വൈരുധ്യങ്ങൾ അവരെ വിശദമായി ചോദ്യം ചെയ്യാൻ പോലീസിനെ പ്രേരിപ്പിച്ചു.

ജൂലൈ 2നാണു ഗുപ്തയെ അറസ്റ്റ് ചെയ്തത്. അവരുടെ മേൽ ഫസ്റ്റ് ഡിഗ്രി മർഡർ ചുമത്തും.

കുട്ടിയുടെ കസ്റ്റഡി സംബന്ധിച്ചു ഗുപ്തയും മുൻ ഭർത്താവ് സൗരഭ് തലത്തിയും തമ്മിൽ തർക്കം നിലവിലുണ്ടെന്നു പോലീസ് പറഞ്ഞു. കുട്ടിയെ ഫ്ലോറിഡയിലേക്കു കൊണ്ടുപോയത് പിതാവ് അറിഞ്ഞിരുന്നില്ല.

മധ്യപ്രദേശിൽ നേതാജി സുബാഷ് ചന്ദ്ര ബോസ് മെഡിക്കൽ കോളജിൽ നിന്നു 2012ൽ മെഡിക്കൽ ബിരുദമെടുത്ത ഗുപ്‌ത യൂണിവേഴ്സിറ്റി ഓഫ് ഒക്‌ലഹോമയിൽ പീഡിയാട്രീഷ്യൻ ആയിരുന്നു. മേയ് 30നു യൂണിവേഴ്സിറ്റി അവരെ പിരിച്ചു വിട്ടിരുന്നു.