ഇന്ത്യൻ എൻജിനീയർ പ്രതീക് പാണ്ഡെ സിലിക്കൺ വാലി മൈക്രോസോഫ്റ്റ് കാമ്പസിൽ മരിച്ചനിലയിൽ ; അന്വേഷണം

സിലിക്കൺ വാലി : മൈക്രോസോഫ്റ്റിന്റെ സിലിക്കൺ വാലി ഓഫീസിൽ ഇന്ത്യക്കാരനായ എൻജിനീയറെ മരിച്ച നിലയിൽ കണ്ടെത്തി. 35കാരനായ പ്രതീക് പാണ്ഡെ എന്ന യുവാവിനെയാണ് ഓഗസ്റ്റ് 20ന് ഓഫീസിൽ മരിച്ച നിലയിൽ കണ്ടെത്തിയത്. മരണകാരണം വ്യക്തമല്ല. ഇക്കാര്യത്തിൽ അന്വേഷണം തുടരുകയാണ്.

ഓഗസ്റ്റ് 19ന് വൈകുന്നേരം പ്രതീക് ഓഫീസിൽ എത്തിയിരുന്നുവെന്നും പിറ്റേന്ന് രാവിലെ മരിച്ച നിലയിൽ കണ്ടെത്തുകയായിരുന്നുവെന്നും കമ്പനി അധികൃതർ വ്യക്തമാക്കിയതായി കുടുംബം അറിയിച്ചു. പ്രതീക് പാണ്ഡെ പലപ്പോഴും രാത്രി വൈകിയും ജോലി ചെയ്തിരുന്നു. മരണവുമായി ബന്ധപ്പെട്ട് മൈക്രോസോഫ്റ്റ് ആഭ്യന്തര അന്വേഷണം ആരംഭിച്ചു. എന്നാൽ ഔദ്യോഗികമായി വിവരങ്ങളൊന്നും പങ്കുവച്ചിട്ടില്ല.

സാന്താ ക്ലാര കൗണ്ടി മെഡിക്കൽ എക്സാമിനർ മരണകാരണം അന്വേഷിക്കുന്നുണ്ട്. ഓഗസ്റ്റ് 20ന് പുലർച്ചെ 2 മണിയോടെ പോലീസ് സ്ഥലത്തെത്തി പരിശോധന നടത്തി. സംശയാസ്പദമായ ഒന്നും ഓഫീസിൽ കണ്ടെത്തിയില്ലെന്ന് മൗണ്ടൻ വ്യൂ പോലീസ് വക്താവ് പറഞ്ഞു. യുവാവിൻ്റെ മരണം ക്രിമിനൽ കേസായി കണക്കാക്കുന്നില്ലെന്ന് പോലീസ് പറഞ്ഞു. പ്രതിക് പാണ്ഡെയുടെ മൃതദേഹം ഇന്ത്യയിലേക്ക് കൊണ്ടുപോകാനുള്ള ശ്രമത്തിലാണ് കുടുംബം. യുവാവിൻ്റെ മാതാപിതാക്കൾ ഇന്ത്യയിലാണുള്ളത്.

മൈക്രോസോഫ്റ്റിന്റെ ഫാബ്രിക് പ്രൊഡക്ട് വിഭാഗത്തിലാണ് പ്രതീക് പാണ്ഡെ ജോലി ചെയ്തിരുന്നത്. ക്ലൗഡ്, എഐ വിഭാഗം മേധാവി സ്കോട്ട് ഗുത്രിക്കാണ് ഇദ്ദേഹം റിപ്പോർട്ട് ചെയ്തിരുന്നത്. 2020ൽ മൈക്രോസോഫ്റ്റിൽ ചേരുന്നതിന് മുൻപ് പാണ്ഡെ വാൾമാർട്ട് ഇൻ‌കോർപറേറ്റഡ്, ആപ്പിൾ ഇൻ‌കോർപറേറ്റഡ് ഉൾപ്പെടെയുള്ള വിവിധ കമ്പനികളിൽ ജോലി ചെയ്തിരുന്നു. സാൻ ജോസ് സ്റ്റേറ്റ് യൂണിവേഴ്സിറ്റിയിലെ പൂർവ വിദ്യാർഥിയായിരുന്ന പ്രതീക് പാണ്ഡെ.