ഇന്ത്യക്കാരന്‍ യുഎസില്‍ വെടിയേറ്റു മരിച്ചു

വാഷിങ്ടന്‍: യുഎസിലെ കാലിഫോര്‍ണിയയില്‍ പൊലീസിന്‍റെ വെടിയേറ്റ് ഇന്ത്യക്കാരന്‍ മരിച്ചു. തെലങ്കാനയില്‍ നിന്നുളള മുഹമ്മദ് നിസാമുദീന്‍ (30) ആണ് മരിച്ചത്. സെപ്റ്റംബര്‍ മൂന്നിനാണ് നിസാമിദീനെ പൊലീസ് വെടിവച്ചത്.

സാന്താക്ളാരയിലെ താമസസ്ഥലത്ത് ഒപ്പം താമസിച്ചിരുന്ന സുഹൃത്തിനെ കത്തിക്കൊണ്ട് കുത്തിയെന്ന വിവരത്തെ തുടര്‍ന്നാണ് പൊലീസ് സ്ഥലത്തെത്തിയത്. കുത്തേറ്റ യുവാവിന് ഗുരുതര പരുക്കുകള്‍ സംഭവിച്ചിരുന്നു. ഇതേ തുടര്‍ന്നാണ് പൊലീസ് നിസാമുദീന് നേരെ വെടിവച്ചത്.

തുടര്‍ന്ന് നിസാമുദീനെ പൊലീസ് ആശുപത്രിയിലേക്ക് മാറ്റിയെങ്കിലും രക്ഷിക്കാന്‍ സാധിച്ചിരുന്നില്ല. നിസാമുദീന്‍റെ മരണത്തിനു പിന്നില്‍ വംശീയ വിവേചനമാണെന്ന് ആരോപിച്ച കുടുംബം, സംഭവത്തില്‍ അന്വേഷണം നടത്തണമെന്നും ആവശ്യപ്പെട്ടിട്ടുണ്ട്.

ഫ്ലോറിഡയിലെ ഒരു കോളെജില്‍ കമ്പ്യൂട്ടര്‍ സയന്‍സില്‍ ബിരുദാനന്തര ബിരുദം നേടിയ നിസാമുദീന്‍ കാലിഫോര്‍ണിയയിലെ സാന്താ ക്ളാരയിലെ ഒരു ടെക് സ്ഥാപനത്തില്‍ ജോലി ചെയ്തു വരികയായിരുന്നു.