ന്യൂയോർക്ക് സിറ്റി മേയർ മംദാനിയുടെ ട്രാൻസിഷൻ ടീമിനെ നയിക്കാൻ ലീന ഖാൻ

ന്യൂയോർക്ക്: ന്യൂയോർക്ക് സിറ്റി മേയറായി തിരഞ്ഞെടുക്കപ്പെട്ട സൊഹ്‌റാൻ മംദാനി, തന്റെ ഭരണപരിഷ്കാരങ്ങൾക്ക് ഊന്നൽ നൽകിക്കൊണ്ട്, ഫെഡറൽ ട്രേഡ് കമ്മിഷൻ (എഫ്‌ടിസി) മുൻ ചെയർപേഴ്‌സൺ ലീന ഖാനെ മുഴുവൻ സ്ത്രീകളുമുള്ള തന്റെ ട്രാൻസിഷൻ (പരിവർത്തന) ടീമിന്റെ സഹ-നേതാവായി തിരഞ്ഞെടുത്തു. ന്യൂയോർക്ക് സിറ്റി ഹാൾ വെറ്ററൻമാരായ മൂന്ന് ദീർഘകാല ഭരണ വിദഗ്ധർക്കൊപ്പമാണ് ഖാൻ ഈ നിർണായക ചുമതല വഹിക്കുക.

പുതിയ ഭരണത്തിന്റെ രൂപീകരണത്തിന് ഈ ടീം നേതൃത്വം നൽകും. താങ്ങാനാവുന്ന വില, ഉത്തരവാദിത്തം, ഭരണത്തിലെ നവീകരണം എന്നിവയിലായിരിക്കും പ്രധാന ശ്രദ്ധയെന്ന് മംദാനി വ്യക്തമാക്കി. 'മികവ്, സമഗ്രത, പുതിയ പരിഹാരങ്ങൾ ഉപയോഗിച്ച് പഴയ പ്രശ്നങ്ങൾ പരിഹരിക്കാനുള്ള ആഗ്രഹം എന്നിവയ്ക്കായി പ്രതിജ്ഞാബദ്ധരായ ഒരു സിറ്റി ഹാൾ നിർമ്മിക്കാൻ ഞങ്ങളുടെ പരിവർത്തന നേതാക്കൾ സഹായിക്കും,' മംദാനി പ്രസ്താവനയിൽ പറഞ്ഞു.

'തൊഴിലാളികൾക്ക് യഥാർഥത്തിൽ താങ്ങാനാവുന്ന ഒരു നഗരം നിർമിക്കേണ്ട സമയമാണിതെന്ന് ന്യൂയോർക്കുകാർ ഈ ആഴ്ച വ്യക്തമായ സന്ദേശം അയച്ചു,' ഖാൻ പറഞ്ഞു. 'ന്യൂയോർക്ക് നഗരത്തിന് ഒരു പുതിയ യുഗം ആരംഭിക്കുകയും ജനാധിപത്യ ഭരണത്തിന് ഒരു പുതിയ മാതൃക സൃഷ്ടിക്കുകയും ചെയ്യുന്ന ഒരു ടീമിനെ നിർമിക്കാൻ സൊഹ്‌റാനെ സഹായിക്കുന്നതിൽ ഞാൻ ആവേശത്തിലാണ്', ലീന ഖാൻ കൂട്ടിച്ചേർത്തു.