യുഎസില്‍ മഞ്ഞള്‍ കൃഷി യാഥാര്‍ഥ്യമാക്കി മലയാളി

ഡാളസ്: അമെരിക്കയിലെ ഡാളസിലെ കരോള്‍ട്ടണില്‍ താമസിക്കുന്ന സണ്ണി കറ്റു വെട്ടിക്കലിന്‍റെ വീടിനു പിന്‍വശത്തെ മുറ്റത്ത് മഞ്ഞള്‍ പൂത്തത് കൗതുകമായി. അമെരിക്കയിലെ കാലാവസ്ഥയില്‍ മഞ്ഞള്‍ ഉണ്ടാകുക എന്നത് അത്ര എളുപ്പമല്ല. അതുകൊണ്ടു തന്നെ സണ്ണിയുടെ വീട്ടു മുറ്റത്തെ മഞ്ഞള്‍ കൃഷിയിലെ വിജയം അത്യപൂര്‍വതയായി.

ഈ കാഴ്ച കാണാന്‍ നിരവധി പേരാണ് എത്തുന്നത്. അമെരിക്കയില്‍ ഒരു പൗണ്ട് മഞ്ഞളിന് അഞ്ച് ഡോളറിനു മുകളിലാണ് വില. ക്യാന്‍സറിനും സൗന്ദര്യ വര്‍ധനവിനും പാചകത്തിനും മറ്റു മരുന്നുത്പാദനത്തിനും മഞ്ഞള്‍ ഒരു അവിഭാജ്യ ഘടകമാണ്. സ്വന്തം ആവശ്യത്തിനുള്ള മഞ്ഞള്‍ കൃഷി ചെയ്ത് ഉണ്ടാക്കണമെന്ന അഭിപ്രായക്കാരനാണ് സണ്ണി.