അഞ്ചാംപനി: ടെക്സസിൽ വാക്സിനേഷൻ എടുക്കാത്ത ഒരു കുട്ടി മരിച്ചു

ടെക്സസ് : ടെക്സസിൽ വാക്സിനേഷൻ എടുക്കാത്ത ഒരു കുട്ടി അഞ്ചാംപനി ബാധിച്ച് മരിച്ചതായി അധികൃതർ ബുധനാഴ്ച സ്ഥിരീകരിച്ചു. ഒരു ദശാബ്ദത്തിനിടെ അഞ്ചാംപനി മൂലമുള്ള യുഎസിലെ ആദ്യത്തെ മരണമാണിതെന്നു ആരോഗ്യ സെക്രട്ടറി റോബർട്ട് എഫ്. കെന്നഡി ജൂനിയർ പറഞ്ഞു. 

"വാക്സിനേഷൻ എടുക്കാത്ത സ്കൂൾ പ്രായത്തിലുള്ള കുട്ടിയെ കഴിഞ്ഞ ആഴ്ച ലുബ്ബോക്കിൽ ആശുപത്രിയിൽ പ്രവേശിപ്പിച്ചു, അഞ്ചാംപനി പോസിറ്റീവ് ആണെന്ന് പരിശോധനയിൽ കണ്ടെത്തി," സംസ്ഥാന ആരോഗ്യ വകുപ്പ് ഒരു പ്രസ്താവനയിൽ പറഞ്ഞു. 

ഈ വർഷം പടിഞ്ഞാറൻ ടെക്സാസിലും അയൽരാജ്യമായ ന്യൂ മെക്സിക്കോയിലും 130 ലധികം മീസിൽസ് കേസുകൾ ഇതിനകം റിപ്പോർട്ട് ചെയ്യപ്പെട്ടിട്ടുണ്ട്. ഇതിൽ ഭൂരിഭാഗവും വാക്സിനേഷൻ എടുക്കാത്ത കുട്ടികളാണ്.

ടെക്സാസിൽ ഏകദേശം 20 പേരെ ആശുപത്രിയിൽ പ്രവേശിപ്പിച്ചിട്ടുണ്ട്. ഇത് കൂടാനുള്ള സാധ്യതയുണ്ടെന്ന് ഉദ്യോഗസ്ഥർ മുന്നറിയിപ്പ് നൽകുന്നു. യുഎസിലെ മീസിൽസുമായി ബന്ധപ്പെട്ട അവസാന മരണം 2015ൽ ആയിരുന്നു.

ആജീവനാന്ത പ്രതിരോധശേഷി നൽകുന്നതിൽ വാക്സിനേഷൻ വളരെ ഫലപ്രദമാണ്. ഒരു ഡോസ് 93 ശതമാനവും രണ്ട് ഡോസുകൾ 97 ശതമാനവും ഫലപ്രദമാണെന്ന് കണക്കാക്കപ്പെടുന്നു.