ഓപ്പറേഷൻ സിന്ധു: ഇറാന് പിന്നാലെ ഇസ്രയേലിൽ നിന്നുള്ള ഇന്ത്യക്കാരെയും ഒഴിപ്പിക്കും

ടെൽഅവീവ്: സംഘർഷം രൂക്ഷമായ ഇറാനിൽ നിന്ന് ഇന്ത്യൻ പൗരൻമാരെ ഒഴിപ്പിക്കുന്നതിന് പിന്നാലെ ഇസ്രായേലിൽ നിന്നും ഇന്ത്യക്കാരെ സുരക്ഷിതമായി ഒഴിപ്പിക്കുമെന്ന് വിദേശകാര്യ മന്ത്രാലയം. ഇസ്രായേലിലേക്ക് ഇറാൻ ആക്രമണം ശക്തമാക്കിയ സാഹചര്യത്തിലാണ് ഇന്ത്യക്കാരെ ഒഴിപ്പിക്കാൻ വിദേശകാര്യ മന്ത്രാലയം തയ്യാറെടുക്കുന്നത് .

ഇസ്രായേലിൽ നിന്ന് കരമാർഗ്ഗം ഇന്ത്യൻ പൗരന്മാരെ ഒഴിപ്പിക്കുമെന്നും തുടർന്ന് വിമാനമാർഗ്ഗം ഇന്ത്യയിലേക്ക് മടങ്ങാനുള്ള ക്രമീകരണങ്ങൾ ചെയ്യുമെന്നും ഔദ്യോഗിക പ്രസ്താവനയിൽ പറയുന്നു. ടെൽ അവീവിലെ ഇന്ത്യൻ എംബസി ഈ പ്രവർത്തനത്തിന്റെ മേൽനോട്ടം വഹിക്കും.

ഇസ്രായേൽ വിടാൻ ആഗ്രഹിക്കുന്നവർ ടെൽ അവീവിലെ ഇന്ത്യൻ എംബസിയിൽ (https://www.indembassyisrael.gov.in/indian_national_reg) എന്ന വിലാസത്തിൽ രജിസ്റ്റർ ചെയ്യണമെന്ന് അഭ്യർത്ഥിക്കുന്നു.

സഹായത്തിനോ കൂടുതൽ വിവരങ്ങൾക്കോ, വ്യക്തികൾക്ക് എംബസിയിൽ സജ്ജീകരിച്ചിരിക്കുന്ന 24/7 കൺട്രോൾ റൂമുമായി +972 54-7520711, +972 54-3278392 എന്നീ നമ്പറുകളിലോ cons1.telaviv@mea.gov.in എന്ന ഇമെയിൽ വിലാസത്തിലോ ബന്ധപ്പെടാം.

ഇസ്രായേലിലെ എല്ലാ ഇന്ത്യൻ പൗരന്മാരും അതീവ ജാഗ്രത പാലിക്കണമെന്നും ഇസ്രായേൽ അധികൃതരും ഹോം ഫ്രണ്ട് കമാൻഡും നൽകുന്ന സുരക്ഷാ നിർദ്ദേശങ്ങൾ കർശനമായി പാലിക്കണമെന്നും മുൻകാല ഉപദേശങ്ങൾ എംബസി ആവർത്തിച്ചു. ഈ മാർഗ്ഗനിർദ്ദേശങ്ങൾ https://www.oref.org.il/eng എന്ന വെബ്‌സൈറ്റിൽ ആക്‌സസ് ചെയ്യാവുന്നതാണ്.

"വിദേശത്തുള്ള ഇന്ത്യൻ പൗരന്മാരുടെ സുരക്ഷയ്ക്ക് ഇന്ത്യാ ഗവൺമെന്റ് ഏറ്റവും ഉയർന്ന മുൻഗണന നൽകുന്നു," സ്ഥിതിഗതികൾ സൂക്ഷ്മമായി നിരീക്ഷിച്ചുവരികയാണെന്നും ടെൽ അവീവിലെ എംബസി ആവശ്യമായ എല്ലാ പിന്തുണയും നൽകുമെന്നും പ്രസ്താവനയിൽ കൂട്ടിച്ചേർത്തു.

ബുധനാഴ്ച ഇന്ത്യ ഇറാനിൽ നിന്ന് 110 ഇന്ത്യൻ വിദ്യാർത്ഥികളെ സുരക്ഷിതമായി ഒഴിപ്പിച്ചു. വിദ്യാർത്ഥികളെ ആദ്യം അർമേനിയയിലേക്ക് കൊണ്ടുപോയി, അവിടെ നിന്ന് വിമാനമാർഗ്ഗം ഇന്ത്യയിലേക്ക് കൊണ്ടുപോയി. അവരെല്ലാം വ്യാഴാഴ്ച പുലർച്ചെ ന്യൂഡൽഹിയിൽ എത്തി