സുപ്രീം കോടതി വിധി ട്രംപിന് അനുകൂലം; എഫ്‌ടിസി കമ്മിഷണറെ പുറത്താക്കാൻ അനുമതി

ഫെഡറൽ ട്രേഡ് കമ്മിഷണർ (എഫ് ടി സി) റെബേക്ക കെല്ലി സ്ലോട്ടറിനെ പുറത്താക്കാൻ ഡോണൾഡ് ട്രംപിന് സുപ്രീം കോടതി അനുമതി. സ്വതന്ത്ര ഏജൻസികളുടെ മേലുള്ള എക്സിക്യൂട്ടീവ് അധികാരത്തിന്റെ പരിധി സംബന്ധിച്ച 90 വർഷം പഴക്കമുള്ള നിയമത്തെ വെല്ലുവിളിച്ചുകൊണ്ടാണ് കോടതിയുടെ ഈ സുപ്രധാന നീക്കം.

മാർച്ചിൽ, എഫ്‌ടിസിയിലെ രണ്ട് ഡെമോക്രാറ്റിക് അംഗങ്ങളായ റെബേക്ക കെല്ലി സ്ലോട്ടറിനെയും അൽവാരോ ബെഡോയയെയും ട്രംപ് പുറത്താക്കിയിരുന്നു. എഫ്‌ടിസിക്ക് സാധാരണയായി അഞ്ച് കമ്മിഷണർമാരുണ്ട്. ഇതിൽ മൂന്ന് പേർ പ്രസിഡന്റിന്റെ പാർട്ടിയിൽ നിന്നും രണ്ട് പേർ എതിർ പാർട്ടിയിൽ നിന്നുമാണ്.

ഈ പുറത്താക്കലിനെതിരെ കമ്മിഷണർമാർ നിയമനടപടിക്ക് ഒരുങ്ങിയിരുന്നു. ഡിസംബറിൽ ഈ കേസിൽ വീണ്ടും വാദം കേൾക്കുമെന്ന് അറിയിച്ചുകൊണ്ട് കോടതി ഒരു അടിയന്തര ഉത്തരവ് പുറപ്പെടുവിച്ചു.