യുഎസ് വിസ അനുവദിച്ച ശേഷവും നിരീക്ഷണം തുടരും

വാഷിങ്ടണ്‍: വിസ ലഭിച്ചാലും അമെരിക്കന്‍ നിയമങ്ങളും ഇമിഗ്രേഷന്‍ ചട്ടങ്ങളും ലംഘിക്കുന്നവരെ തിരിച്ചയയ്ക്കുമെന്ന് യുഎസ് എംബസി. വിസ അനുവദിക്കുന്നതോടെ എല്ലാ കടമ്പകളും കഴിഞ്ഞെന്നു കരുതേണ്ടെന്നും യുഎസ് എംബസി മുന്നറിയിപ്പു നല്‍കി.

വിസ ലഭിച്ചവര്‍ യുഎസ് നിയമങ്ങളും ഇമിഗ്രേഷന്‍ ചട്ടങ്ങളും പാലിക്കുന്നുണ്ടോ എന്ന നിരന്തര നിരീക്ഷണം തുടരും. മറിച്ചാണെങ്കില്‍ തിരിച്ചയയ്ക്കും. ഇക്കാര്യത്തില്‍ വിട്ടുവീഴ്ചയില്ല. വിദ്യാര്‍ഥികള്‍ക്കും താത്കാലിക സന്ദര്‍ശകര്‍ക്കുമായി നല്‍കുന്ന വിസകള്‍ക്കുള്ള അപേക്ഷകരോട് സമൂഹമാധ്യമ അക്കൗണ്ടുകള്‍ "പബ്ളിക്' ആക്കണമെന്നു എംബസി നിര്‍ദേശിച്ചതിനു പിന്നാലെയാണു മുന്നറിയിപ്പ്.

സമൂഹമാധ്യമ ഇടപെടലുകളെക്കുറിച്ചു തെറ്റായ വിവരം നല്‍കുകയും മറച്ചുവയ്ക്കുകയും ചെയ്യുന്നവര്‍ക്കു വിസ നിഷേധിക്കുമെന്നും ഇത്തരക്കാര്‍ക്ക് ആജീവനാന്ത അയോഗ്യത കല്‍പ്പിക്കുമെന്നും എംബസി അറിയിച്ചു.

യുഎസ് വിസ എന്നത് അവകാശമല്ല, സവിശേഷാവകാശമാണെന്ന് എംബസി കഴിഞ്ഞമാസം പറഞ്ഞിരുന്നു. ഓരോ വിസയും ദേശീയ സുരക്ഷ പരിഗണിച്ചു മാത്രമേ അനുവദിക്കൂ എന്നും അധികൃതര്‍ വ്യക്തമാക്കിയിരുന്നു. കുറഞ്ഞത് അഞ്ചു വര്‍ഷത്തെ സമൂഹമാധ്യമ ഇടപെടലുകള്‍ പരിശോധിച്ചശേഷമാണ് 2019 മുതല്‍ യുഎസ് വിസ അനുവദിക്കുന്നത്. അപേക്ഷകന്‍ യുഎസ് നിയമപ്രകാരം സ്വീകാര്യനാണോ എന്നതു പരിശോധിക്കേണ്ടത് അനിവാര്യമെന്നും അധികൃതര്‍.