ട്രാൻസ്‌ജെൻഡർ സൈനിക വിലക്ക്: പ്രതിരോധ സെക്രട്ടറിക്കെതിരെ വീണ്ടും കോടതി

സിയാറ്റിൽ: ട്രാൻസ്‌ജെൻഡറുകൾ സൈന്യത്തിൽ സേവനമനുഷ്ഠിക്കുന്നത് തടയുന്ന പ്രതിരോധ സെക്രട്ടറി പീറ്റ് ഹെഗ്‌സെത്തിന്റെ നടപടിക്ക് യുഎസ് ജില്ലാ ജഡ്ജി ബെഞ്ചമിൻ സെറ്റിൽ വിലക്ക് ഏർപ്പെടുത്തി. ട്രാൻസ്‌ജെൻഡർ സേനാംഗങ്ങളെക്കുറിച്ചുള്ള പുതിയ വിവരങ്ങൾ അവഗണിച്ച് പ്രസിഡന്റ് ഡോണൾഡ് ട്രംപിന്റെ വിവേചനപരമായ ഉത്തരവിനെ അടിസ്ഥാനമാക്കിയുള്ളതാണ് നിരോധനമെന്ന് കോടതി ചൂണ്ടിക്കാട്ടി.

നേരത്തെ യുഎസ് ജില്ലാ ജഡ്ജി അന റെയ്‌സും സമാനമായ വിധി പുറപ്പെടുവിച്ചിരുന്നു. ട്രാൻസ്‌ജെൻഡർ വിഭാഗത്തിന് വൈദ്യസഹായം നൽകുന്ന സ്ഥാപനങ്ങളുടെ ധനസഹായം റദ്ദാക്കാനുള്ള നീക്കം, ട്രാൻസ്‌ജെൻഡർ രോഗികളെ ചികിത്സിക്കുന്ന ഡോക്ടർമാർക്കുള്ള വിവരശേഖരം ഇല്ലാതാക്കൽ, ട്രാൻസ്‌ജെൻഡർ സൈനികരുടെ സേവനം നിയന്ത്രിക്കൽ തുടങ്ങിയ ട്രംപിന്റെ ശ്രമങ്ങളെ ഫെഡറൽ കോടതികൾ തടഞ്ഞിട്ടുണ്ട്.

സൈനിക മേധാവികളുടെ തീരുമാനങ്ങളിൽ ചോദ്യം ചെയ്യപ്പെടാത്ത അധികാരമുണ്ടെന്ന വാദം ഭരണകൂടം മുന്നോട്ടുവച്ചെങ്കിലും, ട്രാൻസ്‌ജെൻഡർ നിരോധനം ആ പരിധി ലംഘിക്കുന്നതായി സെറ്റിലും റെയ്‌സും വ്യക്തമാക്കി. ഈ വിധി 9-ാം സർക്യൂട്ട് അപ്പീൽ കോടതിയിൽ ചോദ്യം ചെയ്യപ്പെട്ടേക്കാം. നേരത്തെ റെയ്‌സിന്റെ വിധിക്കെതിരെ ട്രംപ് ഭരണകൂടം അപ്പീൽ നൽകിയിരുന്നു. 

നിലവിൽ ഏകദേശം 2,000 ട്രാൻസ്‌ജെൻഡർ അംഗങ്ങൾ സൈന്യത്തിൽ സേവനമനുഷ്ഠിക്കുന്നുണ്ടെന്നും ഇവരുടെ സാന്നിധ്യം സൈന്യത്തിന്റെ കരുത്തിനെയോ സന്നദ്ധതയെയോ ബാധിച്ചിട്ടില്ലെന്നും ജഡ്ജി സെറ്റിൽ അഭിപ്രായപ്പെട്ടു. 19 വർഷമായി നാവികസേനയിൽ സേവനമനുഷ്ഠിക്കുകയും നിരവധി മെഡലുകൾ നേടുകയും ചെയ്ത കമാൻഡർ എമിലി ഷില്ലിങ് ആണ് കേസിലെ പ്രധാന വാദി.