ഭരണഘടനാപരമായ വെല്ലുവിളികൾ അതിജീവിക്കുമോ; 2028ലെ മത്സര സാധ്യത തള്ളാതെ ട്രംപ്

വാഷിങ്ടൻ∙ യുഎസ് പ്രസിഡന്റ് ഡോണൾഡ് ട്രംപ് 2028ലെ പ്രസിഡന്റ് തിരഞ്ഞെടുപ്പിൽ വീണ്ടും മത്സരിക്കാനുള്ള സാധ്യത തള്ളിക്കളയാതെ രംഗത്ത്. ജപ്പാനിലേക്കുള്ള യാത്രയ്ക്കിടെ മാധ്യമങ്ങളോട് സംസാരിച്ച ട്രംപ്, ‘ഞാൻ അത് തള്ളിക്കളയുന്നില്ല, നിങ്ങൾ തന്നെയാണല്ലോ പറയേണ്ടത്’ എന്ന് പ്രതികരിച്ചു.

നിലവിൽ, അമേരിക്കൻ ഭരണഘടനയിലെ 22-ാം ഭേദഗതി അനുസരിച്ച് ഒരു വ്യക്തിക്ക് രണ്ടുതവണയിൽ കൂടുതൽ പ്രസിഡന്റ് സ്ഥാനത്തേക്ക് തിരഞ്ഞെടുക്കാൻ സാധിക്കില്ല. എന്നിരുന്നാലും, നിയമപരമായ തടസ്സങ്ങൾ നിലനിൽക്കെ തന്നെ ട്രംപ് ‘2028’ ബ്രാൻഡിങ് ഉപയോഗിച്ചുള്ള പ്രചാരണ സാമഗ്രികൾ പുറത്തിറക്കിയത് ശ്രദ്ധേയമായിരുന്നു.

വൈസ് പ്രസിഡന്റായി മത്സരിച്ച് പിന്നീട് സ്ഥാനാരോഹണം ചെയ്യാമെന്ന ചിലരുടെ തിയറിയെക്കുറിച്ചുള്ള ചോദ്യത്തിന് ട്രംപിന്റെ മറുപടി ഇങ്ങനെയായിരുന്നു: ‘നിയമപരമായി എനിക്ക് അത് ചെയ്യാൻ കഴിയും. എങ്കിലും അത് ജനങ്ങൾക്കിഷ്ടമാകില്ല’. ഭരണഘടനയിലെ 12-ാം ഭേദഗതി അനുസരിച്ച് പ്രസിഡന്റ് സ്ഥാനത്തിന് അയോഗ്യനായവർക്ക് വൈസ് പ്രസിഡന്റാകാനും കഴിയില്ല എന്നത് ഈ സാധ്യതയ്ക്ക് തടസ്സമാണ്.

 അതേസമയം, റിപ്പബ്ലിക്കൻ കോൺഗ്രസ് അംഗമായ ആൻഡി ഒഗിൾസ്, ട്രംപിന് തുടർച്ചയായ മൂന്നാം കാലാവധിക്ക് അനുമതി നൽകുന്ന ഭേദഗതി നിർദ്ദേശം മുന്നോട്ടുവച്ചിരുന്നു. സെനറ്റർ ജെ.ഡി. വാൻസിനെയും മാർക്കോ റൂബിയോയെയും ഉൾപ്പെടുത്തി ഒരു കൂട്ടുകെട്ട് രൂപപ്പെടുത്താനുള്ള ആശയവും ട്രംപ് പങ്കുവെച്ചിട്ടുണ്ട്.